Տեղեկատվական տեխնոլոգիաների ոլորտի ամենամեծ «չկոնֆերանս» «ԲարՔեմփ Երևան 2012»-ին այս տարի ևս մասնակցելու և բանախոսելու են հատուկ հրավիրված հյուրեր: ՍիվիլՆեթի հետ զրույցում միջոցառման կազմակերպիչների թիմի անդամ Արփինե Գրիգորյանը տեղեկացրեց, որ առայժմ հյուրերը երեքն են:
«ԲարՔեմփին Ճանաչված ռուս բլոգեր և լուսանկարիչ Պյոտր Լովիգինը կներկայացնի իր հիմնական նախագծերը: Հյուրերի շարքում է նաև սոցիալապես խոցելի խավերի խնդիրների նորարար լուծումների փորձագետ Դարյա Ալեքսեևան: Նա կպատմի, թե ինչպես աջակցել այդ խավերին նորարար տեխնոլոգիաների օգտագործմամբ, ինչպիսին են օնլայն կամավորությունը, խաղային բջջային ծրագրերը և այլն»,-նշեց Արփինե Գրիգորյանը:
«ԲարՔեմփ Երևան 2012»-ի երրորդ հյուրն է Միջազգային հեռարձակման մարկետինգի խորհրդական և թրեյներ Մայք Վիլերս-Ստյուարտը, որը հանդես է գալու երկու ներկայացմամբ՝ «Սոցիալական ցանցերում բովանդակություն տարածելու յուրօրինակ մեթոդներ. միջազգային օրինակներ» և «Ինչպես ստեղծել յուրօրինակ բովանդակություն, որը մարդիկ հավանեն և ցանկանան տարածել»:
Արփինե Գրիգորյանը հավելեց նաև, որ սպասվում է ևս մի քանի հյուր, որոնց թվում են լինելու հայտնի ռուսական լրատվական գործակալության՝ «Ռիա Նովոստի»-ի աշխատակիցներ:
«ԲարՔեմփ Երևան 2012»-ն անցկացվելու է հունիսի 9-10-ը Հայաստանի ամերիկյան համալսարանում: Կազմակերպիչներն ակնկալում են ավելի քան հազար մասնակից:
«ԲարՔեմփը» միջոցառումներ կազմակերպելու նոր ձևաչափ է: Առաջին անգամ այն անցկացվել է 2005թ. ԱՄՆ-ում՝ Սիլիկոնյան հովտում, ապա ստացել է լայն տարածում ամբողջ աշխարհում։ «ԲարՔեմփ» են անվանում տեղեկատվական տեխնոլոգիաների, ինտերնետի և նոր մեդիաների թեմաներով «չկոնֆերանսները», որոնք անցնում են ոչ ֆորմալ մթնոլորտում, ինչն ապահովում է բաց քննարկումներ և մտքերի ազատ փոխանակում։ Երևանում BarCamp «չկոնֆերանսն» անցկացվում է 2009-ից։
