Ռուս-հայկական նոր ֆիլմը պատրաստ կլինի հոկտեմբերին

Դետեկտիվ ժանրում նկարահանվող ֆիլմը կոչվում է «Հարյուր միլիոնանոց սպանություն»:

Խոշոր բանկի նախագահն անսպասելիորեն մահանում է: Մտերիմները և բոլոր նրանք, ովքեր կախված էին նրանից, փորձում են հետաքննել մեծահարուստի սպանությունն ու գտնել մեղավորին: Թեև նրանցից յուրաքանչյուրն իր դրդապատճառներն ունի, ամենահետաքրքրվածը սակայն հանցագործ խմբավորման ղեկավարներից մեկն է, որը բանկիրի մահից անմիջապես առաջ 100 մլն դոլար էր փոխանցել նրա բանկ։

Ֆիլմի պրոդյուսերը և սցենարի հեղինակը ռուսաստանյան Berg Sound ստուդիայի տնօրեն Միխայիլ Պոգոսովն է: Ֆիլմի ռեժիսորը հայ երիտասարդ ռեժիսոր Ռոման Մուշեղյանն է: Ֆիլմում նկարահանվում են ռուսական կինոյի աստղեր Եկատերինա Ստրիժենովան, Ալյոնա Յակովլևան, Սերգեյ Աստախովը և այլք: Հայ դերասանները հանդես են եկել միայն դրվագային դերերում:

Հիմնական նկարահանումները տեղի են ունեցել Ռուսաստանում։ Օրերս ավարտվել են նաև նկարահանման աշխատանքները Հայաստանում։ ՍիվիլՆեթ-ի հետ զրույցում Ռոման Մուշեղյանը նշեց, որ օգոստոսի 10-ին խումբը մեկնում է Հունաստան, որտեղ և կկատարվեն վերջին նկարահանումները: Ֆիլմը պատրաստ կլինի հոկտեմբերին:

Ֆիլմի դիստրիբյուցիայի մասին ռեժիսորը դեռևս հստակ տեղեկություններ չուներ։ Հայտնի է միայն, որ այն կիրականացվի Մոսկվայում։ Հայաստանյան վարձույթի մասին ևս տեղեկություններ չկան:

Նշենք, որ Berg Sound ստուդիան ստեղծվել է 1995-ին և զբաղվում է հիմնականում ոչ խաղարկային ֆիլմերի, ինչպես նաև հեռուստահաղորդումների պատրաստմամբ: Երկար տարիներ այն համագործակցում է հայտնի մուլտիպլիկատոր Ռոբերտ Սահակյանցի հիմնադրած Z-Studio ընկերության հետ: