Circle.am-ը և «Բիզնես 24»-ը (www.b24.am) կազմել են 2012թ. ամռան ամիսների Հայաստանի առաջատար պրովայդերների տասնյակը` «Հայաստանի առաջատար պրովայդերներ. ամառ 2012» զեկույցը:
Պրովայդերների ցուցանիշները հաշվարկվում են հայաստանյան պրովայդերների և սեփական IP հասցեներ ունեցող այլ կազմակերպությունների IP-ներից Circle.am-ում գրանցված կայքեր կատարված այցելությունների հիման վրա:
Ըստ պրովայդերների
Լավագույն պրովայդերների տասնյակը շարունակում է գլխավորել Beeline ընկերությունը: Ամռան ընթացքում առաջատարի ցուցանիշը նվազել է 0.87 տոկոսային կետով, իսկ անցյալ տարվա օգոստոսի համեմատ Beeline-ի ցուցանիշն աճել է 0.41 տոկոսային կետով:
Բջջային ինտերնետի առաջատար Orange-ը զբաղեցնում է երկրորդ հորիզոնականը: Ամռան ընթացքում բջջային օպերատորի ցուցանիշն աճել է 0.4 տոկոսային կետով, իսկ անցյալ տարվա համեմատ արձանագրվել է նվազում 1.31 տոկոսային կետով:
Ucom-ը զբաղեցնում է երրորդ հորիզոնականը: Ամռան ընթացքում ընկերությունն արձանագրել է աճ 1.34 տոկոսային կետով, իսկ անցյալ տարվա օգոստոսի համեմատ աճը կազմել է 5 տոկոսային կետ:
Չորրորդ հորիզոնականում է Vivacell-MTS-ը: Առաջատար բջջային օպերատորի ցուցանիշն ամռան ընթացքում աճել է 0.39 տոկոսային կետով: Անցյալ տարվա օգոստոսի համեմատ Vivacell-MTS-ի ցուցանիշը նվազել 1.16 տոկոսային կետով:
Մեկ հորիզոնականով բարձրացել և հինգերորդ տեղում է հայտնվել GNC-ALFA ընկերությունը: Հունիս-օգոստոսին ընկերության ցուցանիշն աճել է 0.39 տոկոսային կետով, իսկ վերջին 12 ամիսների աճը կազմել է 2.04 տոկոսային կետ:
Վեցերորդ հորիզոնականում է ADC-ն: Այս տարվա մայիսի համեմատ ընկերության ցուցանիշը նվազել է 0.09 տոկոսային կետով, իսկ 2011թ.-ի օգոստոսի համեմատ կրճատումը կազմել է 1.19 տոկոսային կետ:
Յոթերորդ հորիզոնականում է Arminco-ն: Ամռան ընթացքում ընկերության ցուցանիշը կրճատվել է 0.15 տոկոսային կետով, իսկ անցյալ տարվա նույն ժամանակահատվածի համեմատ կրճատումը կազմել է 0.68 տոկոսային կետ:
Ղարաբաղ-Տելեկոմը շարունակում է զբաղեցնել ութերորդ հորիզոնականը: Ամռան ընթացքում պրովայդերի ցուցանիշը կրճատվել է 0.05 տոկոսային կետով, իսկ անցյալ տարվա օգոստոսի համեմատ արձանագրվել է կրճատում 0.01 տոկոսային կետով:
Իններորդ տեղում է MyLAN-ը: Մայիսի համեմատ ընկերության ցուցանիշը կրճատվել 0.03 տոկոսային կետով:
Տասնյակը եզրափակում է WEB-ը: Ամռան ընթացքում պրովայդերի ցուցանիշը կրճատվել է 0.04 տոկոսային կետով: Անցյալ տարվա համեմատ արձանագրվել է կրճատում 0.26 տոկոսային կետով:
Տարեկան միտումներ
2012թ. օգոստոսի դրությամբ առաջատար 10 պրովայդերներին բաժին է ընկնում Circle.am-ում գրանցված հայաստանյան այցելությունների 98.17%-ը: Այս տարվա մայիս ամսին այս ցուցանիշը կազմել է 97.21%, իսկ 2011թ.-ի օգոստոսին` 96.52%: Ամռան ընթացքում ցուցանիշն աճել է 0.96, իսկ վերջին տարում` 1.65 տոկոսային կետով:
Ինչ վերաբերում է առաջատար 5 պրովայդերներին, ապա պատկերը հետևյալն է. 2012թ. օգոստոսի դրությամբ նրանց բաժին է ընկել Circle.am-ում գրանցված այցելությունների 91.74%-ը, մայիսին` 90.57%-ը, իսկ 2011թ. օգոստոսին` 89.67%-ը: Ամռան ընթացքում այս ցուցանիշն աճել է 1.17, իսկ անցյալ տարվա նույն ժամանակահատվածի համեմատ` 2.07 տոկոսային կետով:
Առաջատար պորվայդերների ցուցակի առաջին 5 հորիզոնականները զբաղեցնող ընկերությունները առաջիկայում կշարունակեն մնալ Հայաստանի մանրածախ ինտերնետի շուկայի հիմնական խաղացողներ:
Ամռան ընթացքում նկատվում է բջջային այցելությունների սեզոնային աճ: Մոտ ապագայում բջջային ինտերնետի ոլորտում կտրուկ զարգացումներ թերևս չեն ակնկալվում. Orange-ի և Vivacell-MTS-ի մասնաբաժինների մեծ տատանումներ, ըստ ամենայնի, չեն լինի: Երկու օպերատորների մոտ արձանագրված տարեկան ցուցանիշների զգալի անկումը պայմանավորված է լարային կամ ֆիքսված ինտերնետի աճի ավելի բարձր տեմպերով:
Ստացված տվյալները վկայում են նաև, որ Ucom-ը վերականգնել է աճի բարձր տեմպերը: GNC-ALFA-ն նույնպես արագորեն ավելացնում է իր մասնաբաժինը: Ի դեմս այս երկու պրովայդերների` լարային կամ ֆիքսված ինտերնետի ոլորտում Beeline-ը լուրջ մրցակիցներ ունի, և հաշվի առնելով տարվա սկզբից գրանցված անկումը` կարելի է ենթադրել, որ առաջատարին չի հաջողվում պահպանել մրցակիցներին հավասար աճի տեմպեր: Աճի նախկին տեմպերը վերականգնելու համար Beeline-ի կողմից նոր որակի ծառայությունների ներդրման կարիք կա, ինչը կարճ ժամանակահատվածում իրականացնելու պոտենցիալ ընկերությունն ունի:
Ամսական ցուցանիշներ
Հունիս – 1. Beeline` 48.81% (մայիսի համեմատ -0.20 տոկ. կետ), 2. Orange` 16.87% (-0.11 տոկ. կետ), 3. Ucom` 12.85% (+0.40 տոկ. կետ), 4. Vivacell-MTS` 9.01% (-0.06% տոկ. կետ), 5. GNC-ALFA` 3.10% (+0.21 տոկ. կետ), 6. ADC` 3.05% (-0.01 տոկ. կետ), 7. Arminco` 2.16% (+0.09 տոկ. կետ), 8. Karabakh-Telecom` 0.73% (+0.06 տոկ. կետ), 9. MyLan` 0.45% (-0.08 տոկ. կետ), 10. Web` 0.44% (-0.04 տոկ. կետ):
Հուլիս – 1. Beeline` 48.34% (հունիսի համեմատ -0.47 տոկ. կետ), 2. Orange` 17.32% (+0.45 տոկ. կետ), 3. Ucom` 13.45% (+0.60 տոկ. կետ), 4. Vivacell-MTS` 9.07% (+0.06% տոկ. կետ), 5. GNC-ALFA` 3.14% (+0.04 տոկ. կետ), 6. ADC` 2.98% (-0.07 տոկ. կետ), 7. Arminco` 1.98% (-0.18 տոկ. կետ), 8. Karabakh-Telecom` 0.69% (-0.04 տոկ. կետ), 9. MyLan` 0.46% (+0.01 տոկ. կետ), 10. Web` 0.45% (+0.01 տոկ. կետ):
Օգոստոս – 1. Beeline` 48.14% (հուլիսի համեմատ -0.20 տոկ. կետ), 2. Orange` 17.38% (+0.06 տոկ. կետ), 3. Ucom` 13.79% (+0.34 տոկ. կետ), 4. Vivacell-MTS` 9.15% (+0.08% տոկ. կետ), 5. GNC-ALFA` 3.28% (+0.14 տոկ. կետ), 6. ADC` 2.97% (-0.01 տոկ. կետ), 7. Arminco` 1.92% (-0.06 տոկ. կետ), 8. Karabakh-Telecom` 0.62% (-0.07 տոկ. կետ), 9. MyLan` 0.47% (+0.01 տոկ. կետ), 10. Web` 0.44% (-0.01 տոկ. կետ):
