Կենտրոնական ընտրական հանձնաժողովն այսօր քննարկեց «Ժառանգության» առաջնորդ, նախագահի թեկնածու Րաֆֆի Հովհաննիսյանի լիազոր ներկայացուցիչ Արմեն Մարտիրոսյանի դիմումը՝ անվավեր ճանաչելու նախագահի թեկնածու Սերժ Սարգսյանի գրանցումը, և 7 կողմ, 0 դեմ ձայնով մերժեց դիմումը՝ վկայակոչելով Ընտրական օրենսգիրքը։
ԿԸՀ նախագահ Տիգրան Մուկուչյանը որոշման նախագիծը ներկայացնելով` հայտնեց հանձնաժողովի որոշման հիմնավորումները: Նրա խոսքով` թեկնածուին գրանցումից զրկելը ծայրահեղ միջոց է, և դրան պետք է դիմել միայն այն ժամանակ, երբ «խախտումների թողած հետևանքներն անդառնալի են» և էապես ազդել են ընտրության արդյունքների վրա:
Արմեն Մարտիրոսյանի դիմումի համաձայն` նախընտրական քարոզչության համար տարածքների վարձակալության, տպագրական ծախսերի մասին Սերժ Սարգսյանի ներկայացրած հայտարարագրում 10%-ով պակաս էր նշված ծախսերի թիվը։
ԿԸՀ որոշումը կարող է բողոքարկվել ՀՀ վարչական դատարանում` ուժի մեջ մտնելուց հետո օրացուցային երեք օրվա ընթացքում:
