2013թ. աշխարհում բարձրացել է տնտեսական լավատեսության մակարդակը, վկայում են Gallup International/WIN անկախ հետազոտական գործակալությունների՝ «Հույսի և հիասթափության գլոբալ բարոմետրը»: Բարոմետրում երկրները բաժանված են լավատեսների ու հոռետեսների: Լավատեսների աղյուսակը գլխավորում է Վրաստանը: Հայաստանը հոռետեսների թվում է. այստեղ մեկ տարվա ընթացքում հոռետեսությունն ավելացել է 19%-ով: Գնահատումն անցկացվել է 2012թ.:
Տնտեսական սպասումների ինդեքսը հաշվարկվում է 35 տարի շարունակ՝ երկրներին առանձնացնելով լավատես կամ հոռետես խմբերում։ Հարցումն անցկացվում է ինդեքսում ընդգրկված երկրների բնակչության շրջանում, նրանց առաջարկվում է գնահատել տնտեսության հեռանկարները (ակնկալվում է տնտեսական իրավիճակի բարելավում կամ վատթարացում) առաջիկա մեկ տարվա կտրվածքով։
Այս տարի հարցումն անցկացվել է աշխարհի 54 երկրում, մասնակցել է 60 հազ. մարդ: Ըստ հարցման արդյունքների՝ 2013թ. աշխարհում ավելացել է լավատեսների թիվը, լավատեսության գլոբալ ցուցանիշի աճը կազմել է 9%։
Այսպես՝ աշխարհի բնակչության 35%-ը տնտեսական հեռանկարների հարցում լավատես է: 28%-ը տնտեսական իրադրության վատթարացում է կանխատեսում: 29%-ի կարծիքով՝ տնտեսությունում որևէ բան չի փոխվի։
Հայաստանը տնտեսական հոռետեսության աճ արձանագրած երկրների խմբում է (ցուցանիշը՝ 0-ից մինչև -50%): Նախորդ տարվա +8% լավատեսությունից Հայաստանը դարձել է -11% հոռետես:
Թիվ մեկ լավատեսը աշխարհում Վրաստանն է՝ 63%, որին հաջորդում է Ադրբեջանը՝ 56%:
Ամենահոռետեսը Պորտուգալիան է (-85%): Հոռետեսության կտրուկ աճ է արձանագրել Լիբանանը՝ -23%-ից մինչև -66%: Հոռետես է նաև Ֆինլանդիա, որտեղինդեքսն այս տարի կազմել է -35%՝ 2012թ. 14%-ի համեմատ։ Տնտեսական հեռանկարների հարցում հոռետեսությունը փոքր-ինչ նվազել է ֆրանսիացիների շրջանում՝ -67%` 2012թ. -80%-ի համեմատ: Ֆրանսիայի հետ միևնույն խմբում են Իսլանդիան, Ավստրիան և Ուկրաինան։
Ամենից լավատեսները հիմնականում զարգացող երկրներն են։ Զարգացած երկրների շրջանում գերակշռում են հոռետեսները։
Տնտեսական հեռանկարների հարցում ամենալավատեսական տրամադրությունները Հարավային Ամերիկայի և Հարավարևելյան Ասիայի երկրներում են։ Արևմտյան և Արևելյան Եվրոպան հոռետեսների ցանկում են։ BRIC-ի երկրներում տնտեսական լավատեսության մակարդակը 29% է, Մեծ յոթնյակի երկրներում՝ -23%:
Հայաստանը Շվեյցարիայի, Մակեդոնիայի և Թունիսի հետ տնտեսական հոռետեսության աճ արձանագրածների խմբում է (0-ից մինչև -50%): Այսպես՝ 2013թ. Հայաստանը -11%-ով 54 երկրի շրջանում զբաղեցրել է 22-րդ հորիզոնականը: 2012թ. Հայաստանը 8% ցուցանիշով 58 երկրների շարքում 18-րդն էր: 2013թ. թիվ մեկ լավատեսը աշխարհում Վրաստանն է (63%), որը 2012-ի ինդեքսում 7-րդն է եղել՝ 43% ցուցանիշով: Ադրբեջանը երկրորդ ամենալավատեսն է Վրաստանից հետո՝ 56% ցուցանիշով: 2012-ին նա 9-րդ հորիզնականում էր՝ 30%-ով:
Ամենալավատես երկրների թոփ 10-ը (%) |
Ամենահոռետես երկրների թոփ-10-ը (%) |
||
Վրաստան |
63 |
Պորտուգալիա |
-85 |
Ադրբեջան |
56 |
Ֆրանսիա |
-67 |
Բրազիլիա |
45 |
Լիբանան |
-66 |
Մոզամբիկ |
42 |
Բելգիա |
-64 |
Չինաստան |
32 |
Իսպանիա |
-59 |
Պերու |
31 |
Բոսնիա |
-53 |
Հնդկաստան |
27 |
Իռլանդիա |
-51 |
Սաուդյան Արաբիա |
27 |
Գերմանիա |
-46 |
Ֆիլիպիններ |
25 |
Լեհաստան |
-45 |
Էկվադոր |
24 |
Մեծ Բրիտանիա |
-41 |