Սառցախցիկի հիմնական օրենքը հետևյալն է՝ այնտեղ գտնվող ցանկացած ուտելիք այլևս չի ունենա նույն համը, իսկ որոշ ուտելիքների դեպքում նույնիսկ ահավոր համ կստանա, սրտխառնոց կառաջացնի կամ կպայթի ու կաղտոտի ամբողջ խցիկը: Ուստի առաջարկում ենք ծանոթանալ այն սննդամթերքների ցանկին, որոնք երբեք, ոչ մի դեպքում չի կարելի պահել սառցախցիկում:
Ձուն իր կճեպով
Սառցարանում սրանք դառնում են փոքրիկ ռումբեր սննդային թունավորումների համար: Բացասական ջերմաստիճանը հանգեցնում է ձվի հեղուկ մասի ընդարձակմանը, ինչը կարող է ճաքեցնել կճեպը և ներս թողնել զզվելի բակտերիաներին: Նույնիսկ եթե չպայթի և ձեր մաքուր սառցախցիկը չվերածի աղետի գոտու՝ հում կամ խաշած ձվի սպիտակուցը կվերածվի մածուցիկ ռետինանման զանգվածի, որը, մեղմ ասած, հաճելի չէ ուտել:
Թարմ բնամթերքը
Խոսքը վերաբերում է այն ամենին, ինչը ջրային մաս է պարունակում, հատկապես՝ ձմերուկը, խնձորը, նեխուրը, կանաչեղենը, կարտոֆիլն ու վարունգը: Նրանց մեջ պարունակվող ջուրը վերածվում է սառույցի, իսկ երբ այն հալվում է, այս բնամթերքները վերածվում են փափուկ, լպրծուն նմուշների, որոնք կարող են դպրոցական ճաշարանի մասին կապված տխուր հիշողություններ արթնացնել: Նույնը վերաբերում է դեղաբույսերին՝ սառցախցիկից հանելուց հետո դրանք կարող են վերածվել մուգ շագանակագույն, լխկած մի կծիկի:
Կաթնամթերք
Կաթը, թթվասերը, փափուկ պանրի տեսակները՝ րիկոտա, հալած պանրիկներ, ինչպես նաև յոգուրտը դառնում են կաթնաշոռանման զանգված, ինչի հետ հաճելի չէ գործ ունենալ:
Հալեցված միս և ծովամթերք
Մի բան է սառցարանում հավի կրծքամիս դնել, մեկ այլ բան՝ հանել, ընթրիք պատրաստելու համար հալեցնել, ապա միտքը փոխել ու նորից դնել սառցախցիկը: Այդ տեղափոխումները բակտերիաներին հիանալի ժամանակ են ընձեռում վերարտադրվելու ու բազմանալու համար, ինչը սննդային թունավորման վտանգ է առաջացնում:
Ձվի հիմքով սոուսներ
Մայոնեզը, հոլանդական սոուսը, ձվային հիմքով նման այլ սոուսները տեղ չունեն սառցարանում, քանի որ ջրային մասն առանձնանում է, և դրանք ստանում են տհաճ համ ու հոտ:
