Հայաստանի օլիպմիական կոմիտեն մտադիր է բողոքարկել ամառային օլիմպիական խաղերում հունահռոմեական ոճի ըմբշամարտիկ Միհրան Հարությունյանի եզրափակից գոտեմարտի արդյունքը։ Այս մասին, ինչպես հաղորդում են ՀԱՕԿ-ի լրատվության բաժնից, սեպտեմբերի 5-ին կայացած մամուլի ասուլիսին ասել է կոմիտեի գլխավոր քարտուղար Հրաչյա Ռոստոմյանը։
«Բոլորդ տեսաք Հարությունյանի եզրափակիչ գոտեմարտը: Տեսաք, թե ինչ անբարո և լկտի ձևով նրանից խլեցին հաղթանակը»,- ասել է Ռոստոմյանը:
Նա նշել է, որ ՀԱՕԿ-ը վարձել է միջազգային իրավաբաններ, որոնք աշխատանքներ են տանում բողոքի հայեցակարգի ուղղությամբ:
«Այստեղ նրբություն կա. մենք պետք է հստակ ներկայացնենք մեր բողոքարկման պատճառը: Չենք կարող միայն պասիվության համար դիմել դատարան, քանի որ դա ցանկացած մրցավար անհատապես է գնահատում: Հարցը պետք է խորն ուսումնասիրվի համապատասխան մարդկանց կողմից, և հետո նոր հայցադիմում ներկայացվի Լոզանի մարզական վճռաբեկ դատարան»,- ասել է ՀԱՕԿ գլխավոր քարտուղարը:
Միհրան Հարությունյանը «Ռիո-2016»-ում արծաթե մեդալակիր դարձավ։ Նա ոսկե մեդալից զրկվեց մրցավարական անարդարության պատճառով։
