Րաֆֆի Հովհաննիսյանի հանրահավաքների շարքը շարունակվում է Հայաստանի հարավում: Իր մարդաշատությամբ և էներգետիկայով հատկապես աչքի ընկավ Կապանում տեղի ունեցած հանրահավաքը: Ընդհանրապես, Սյունիքի մարզը ընդդիմության համար համարվում է ամենախնդրահարույց մարզերից մեկը, որտեղ ընդդիմության առաջնորդները գրեթե միշտ պարտվել են, իսկ հասարակությունը, մյուս մարզերի հետ համեմատած, իշխանամետ դիրքորոշում է հայտնում ընտրությունների ժամանակ:
Փետրվարի 18-ի ընտրությունների նույնիսկ պաշտոնական արդյունքները ցույց տվեցին, որ Սյունիքի մարզկենտրոն Կապանում հաղթել է Սերժ Սարգսյանի հիմնական մրցակից Րաֆֆի Հովհաննիսյանը: Սա այն դեպքում, երբ մարզպետ Սուրիկ Խաչատրյանի ջանքերով Հայաստանի հարավային մարզում գրեթե ֆեոդալական կարգեր են հաստատվել: Ամենակարող համարվող Սուրիկ Խաչատրյանի նստավայր քաղաքում Րաֆֆի Հովհաննիսյանի հաղթանակը կարելի է աննախադեպ հաջողություն համարել: Իսկ փետրվարի 27-ին Կապանում տեղի ունեցած էմոցիոնալ, էներգիայով լի հանրահավաքը պարզապես ապացուցում է, որ փետրվարի 18-ին գրանցված հաղթանակը ամենևին էլ պատահականություն չէ:
Մարզերում կենտրոնական իշխանությունների նկատմամբ դժգոհությունը ավելի կրիտիկական մակարդակի է հասել. հասարակությունը, փաստացի անտեսելով տեղական իշխանիկներին, ակնհայտ արտահայտում է իր դժգոհությունը և պատրաստակամ է նույնիսկ հրապարակում այդ մասին բարձրաձայնել:
Սյունիքում մարդկանց վարքագծի նման փոփոխությունը և վախի հաղթահարումը խոսում է այն մասին, որ առնվազն հանրային գիտակցության մեջ հեղափոխություն է տեղի ունեցել:
Այս ամենը բավական հիմնավոր պատճառներ ունի. նախ մարզերում և հեռավոր բնակավայրերում սոցիալ-տնտեսական իրավիճակը կարելի է աղետալի համարել, իսկ ապօրինությունների մակարդակը մի քանի անգամ գերազանցում է մայրաքաղաքի ցուցանիշները: Անելանելիությունից դրդված՝ մարզերում մերժում են գործող իշխանություններին և ելքեր փնտրում ճգնաժամային իրավիճակից:
Իշխանության նկատմամբ վերաբերմունքի տեսակետից բառացիորեն նույն իրավիճակն էր հանրապետության երկրորդ քաղաք Գյումրիում, որտեղ նույնպես, ի տարբերություն մայրաքաղաք Երևանի, «Ժառանգության» առաջնորդին ընդունում էին առավել ընդգծված խանդավառությամբ: Եթե Րաֆֆի Հովհաննիսյանին հաջողվի մարզերում տիրող տրամադրությունները տեղափոխել Երևան, իշխանությունները բավական բարդ իրավիճակում կհայտնվեն: ν
Պատմություններ
