Ճանապարհային երթևեկության տուգանքների մասին օտարերկրացիները կծանուցվեն ՀՀ սահմանային անցակետերում

Տեսանկարահանող սարքերով արձանագրված ճանապարհային երթևեկության կանոնների խախտումների համար օտարերկրյա քաղաքացիները կծանուցվեն Հայաստանի սահմանային անցակետերում՝ մուտքի կամ ելքի ժամանակ։ Ազգային ժողովի կողմից ընդունվել է «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» ՀՀ օրենքում լրացումներ կատարելու մասին օրենքը:

Նոր կարգավորմամբ օտարերկրացիների տվյալները ստացվելու են սահմանային էլեկտրոնային կառավարման տեղեկատվական համակարգից անձնագրային հարցման միջոցով, ինչի կապակցությամբ իշխանությունները հորդորում են մեքենաներն օտարերկրացիներին հանձնող ֆիզիկական և իրավաբանական անձանց վարչական մարմին ներկայացվող նյութերին կցել սահմանահատումը հաստատող փաստաթղթի պատճենը։ 

Սահմանային համակարգից տվյալների ստացման անհնարինության դեպքում խախտումն օտարերկրացու կողմից կատարված լինելու փաստը չի հաստատվի, և վարչական պատասխանատվությունը կկրի տրանսպորտային միջոցի սեփականատերը կամ իրավաբանական անձի ղեկավարը։