Ալեն Սիմոնյանը հանդիպել է «Ռոսատոմ»-ի գլխավոր տնօրենին

Պաշտոնական այցով Ռուսաստանի Դաշնությունում գտնվող ԱԺ նախագահ Ալեն Սիմոնյանը փետրվարի 6-ին հանդիպել է «Ռոսատոմ» պետական կորպորացիայի գլխավոր տնօրեն Ալեքսեյ Լիխաչովի հետ: Այս մասին հայտնում են ԱԺ մամուլի ծառայությունից։

Հաղորդագրության մեջ նշվում է, որ զրուցակիցները քննարկել են երկկողմ հետաքրքրություն ներկայացնող հարցեր:

***

Հայաստանում վաղուց է քննարկվում նոր ատոմակայան կառուցելու հարցը։ Արծարծվող թեմաների շարքում նաև նոր ատոմակայանի հզորությունն է։

Ուսումնասիրվում են Ռուսաստանի Դաշնության, Միացյալ Նահանգների, Չինաստանի, Կորեայի և Ֆրանսիայի մոդելնելները, որի ընտրության հարցում Հայաստանի կառավարությունը դեռ որոշում չունի։ 

Հունվարին նախագահ Դոնալդ Թրամփը հայտարարել էր, որ փոխնախագահ Ջեյ Դի Վենսի՝ փետրվարին սպասվող երևանյան այցի շրջանակներում Հայաստանի հետ կկնքվեն միջուկային էներգետիկայի և կիսահաղորդիչների ոլորտներում ռազմավարական տնտեսական համաձայնագրեր։

Փետրվարի 3-ին տարածքային կառավարման և ենթակառուցվածքների նախարար Դավիթ Խուդաթյանը հայտարարել է, որ նոր ատոմակայանի տիպը մոդուլային կլինի։

Մոդուլային ատոմակայանը միջուկային էներգետիկայի նոր սերնդի կայան է, որը տարբերվում է դասական ատոմակայաններից իր չափերով, կառուցման եղանակով և ճկունությամբ։

Մեծամորի ատոմակայանի շահագործման ժամկետը պետք է ավարտվեր 2016-ին։ Այն պարբերարաբար երկարաձգվել է։ Կառավարության 2021-ի որոշմամբ՝ այն նախատեսվում է շահագործել մինչև 2036-ը։ Տեխնիկական վերազինումն իրականացնում է «Ռոսատոմը»։