Civilnet
Առողջության համընդհանուր ապահովագրության հիմնադրամը փետրվարի 9-ին համագործակցության հուշագիր է ստորագրել «Ինգո Արմենիա», «ԷՖԵՍ», «Լիգա Ինշուրանս» և «Սիլ Ինշուրանս» ապահովագրական ընկերությունների հետ՝ պետական համակարգի ներդրման շրջանակներում մասնավոր հատվածի հետ փոխգործակցությունը պաշտոնականացնելու նպատակով։
Համաձայնագիրը նախատեսում է փորձի փոխանակում և համատեղ նախաձեռնություններ, որոնք ուղղված են առողջապահական ծառայությունների որակի բարձրացմանը, շահառուների սպասարկման բարելավմանը և տվյալների անվտանգ փոխանակմանը։
Հայաստանի առողջապահության նախարար Անահիտ Ավանեսյանը նշել է, որ պետական ապահովագրական փաթեթը միտված է բազային և առաջնահերթ խնդիրների լուծմանը, սակայն լիարժեք համակարգ ունենալու համար անհրաժեշտ են մասնավոր ընկերությունների կողմից առաջարկվող հավելյալ ծառայությունները։
«Մենք ակնկալում ենք հավելյալ ծառայություններ, որոնք պետք է առաջարկեն մասնավոր ապահովագրական ընկերությունները», - հայտարարել է Ավանեսյանը՝ շեշտելով մասնավոր հատվածի դերը ոլորտի զարգացման գործում։
Ըստ նախարարի՝ պետական համակարգի ներդրումը ոչ միայն չի սահմանափակելու մասնավոր ընկերությունների գործունեությունը, այլև ստեղծելու է զարգացման նոր հնարավորություններ։
Պատմություններ
