Civilnet
«ՀայաՔվե» ազգային քաղաքացիական միավորումը և «Միասնության թևեր» քաղաքական նախաձեռնությունը ստորագրեցին համագործակցության հուշագիր: Այս մասին հայտնել է «ՀայաՔվե» ֆեյսբուքյան էջը։
«Պատրաստակամ ենք մեկ ճակատով հանդես գալու առաջիկա համապետական ընտրություններում, հետևաբար` միավորում ենք մեր ջանքերը և հայտարարում «Միասնության թևեր» քաղաքական նախաձեռնության հետ երկարատև քաղաքական համագործակցություն հաստատելու և միասնաբար հանդես գալու մասին»,- ասված է հայտարարության մեջ:
Հուշագրով կողմերը հայտարարել են առաջիկա խորհրդարանական ընտրություններին «Միասնության թևեր» քաղաքական միավորի հիման վրա միասնական մասնակցության մասին։
«Միասնության թևեր» քաղաքական նախաձեռնության առաջնորդը Հայաստանի մարդու իրավունքների նախկին պաշտպան Արման Թաթոյանն է։ Քաղաքական ուժի ձևավորման մասին հայտարարվել է հոկտեմբերին։
«ՀայաՔվե» ազգային քաղաքացիական միավորման համակարգողն Ավետիք Չալաբյանն է։ 2026-ի խորհրդարանական ընտրություններին մասնակցելու մասին «ՀայաՔվե»-ն հայտարարել է փետրվարին։ Այդ ժամանակ Չալաբյանը հայտարարել էր, որ իրենց ուժերը կհամադրեն գաղափարակից այլ կառույցների հետ՝ «միասնական ճակատով» հանդես գալու համար։
Հայաստանում խորհրդարանական ընտրությունները տեղի կունենան 2026-ի հունիսի 7-ին։
Պատմություններ
