ԵՄ-ն մեկ տարով կասեցնում է Վրաստանի պաշտոնյաների առանց վիզայի մուտքը

Եվրոպական հանձնաժողովը կասեցրել է առանց վիզայի ճամփորդության իրավունքը Վրաստանի դիվանագիտական, ծառայողական և պաշտոնական անձնագրեր ունեցողների համար։ Որոշումը կտևի 2026-ի մարտի 6-ից մինչև 2027 թվականի մարտի 6-ը։

Վիզայի կասեցման մեխանիզմը ակտիվացվել է՝ ի պատասխան Վրաստանի կողմից վիզային ազատականացման շրջանակներում ստանձնած պարտավորությունների՝ ժողովրդավարության և հիմնարար իրավունքների ոլորտում դիտավորյալ ու շարունակական խախտման։

«Վրաստանի իշխանությունների գործողությունները 2024 թվականի հոկտեմբերից ի վեր, ներառյալ բողոքողների, ընդդիմադիր քաղաքական գործիչների և անկախ լրատվամիջոցների նկատմամբ բռնությունները, բացասաբար են անդրադարձել Վրաստանում իրավիճակի վրա և հանգեցրել են մի շարք հիմնարար իրավունքների ու միջազգային իրավական նորմերի խախտման»,- նշված է Եվրոպական հանձնաժողովի տարածած հաղորդագրության մեջ։

Նշվում է, որ Վրաստանը նաև հրաժարվել է համապատասխանեցնել իր վիզային քաղաքականությունը ԵՄ-ի հետ, ինչը անձնագրային ազատ ճամփորդության պահպանման էական պայման է։