Լիբանանն ու Իսրայելը վերջին երեք տասնամյակի ընթացքում առաջին անգամ դիվանագիտական բանակցություններ են անցկացրել։
Հանդիպման նպատակն է վերջ դնել Իսրայելի և Իրանի կողմից աջակցվող «Հեզբոլլահ» խմբավորման միջև ընթացող մարտերին:
ԱՄՆ պետքարտուղար Մարկո Ռուբիոն, որը հանդես է եկել որպես միջնորդ, հայտարարել է, որ սա «պատմական հնարավորություն է»՝ վերջ դնելու «Հեզբոլլահի» ազդեցությանը։
ԱՄՆ-ի տարածած հայտարարության մեջ ասվում է, որ կողմերը պայմանավորվել են սկսել ուղիղ բանակցություններ, որոնց ժամկետներն ու վայրը դեռ պետք է որոշվեն։ Իսրայելը հայտարարել է, որ ցանկանում է զինաթափել բոլոր ոչ պետական ահաբեկչական խմբավորումները՝ նկատի ունենալով «Հեզբոլլահին»։
Լիբանանն իր հերթին կոչ է արել զինադադար հաստատել և միջոցներ ձեռնարկել երկրում հումանիտար ճգնաժամի հաղթահարման համար։ Երկու երկրները դիվանագիտական հարաբերություններ չունեն, իսկ նրանց միջև վերջին ուղիղ, բարձր մակարդակի բանակցությունները կայացել են 1993-ին։
Ավելի քան 2000 մարդ է զոհվել մարտի 2-ին Լիբանանում իսրայելական ռազմական գործողությունների մեկնարկից ի վեր, որոնք սկսվել են Իրանի ուղղությամբ ԱՄՆ-ի և Իսրայելի հարվածներից ընդամենը մի քանի օր անց։
Իսրայելը հայտարարել է, որ Լիբանանում իր գործողությունները նպատակ ունեն զինաթափելու և կազմաքանդելու խմբավորումը, որի դեմ Իսրայելը պայքարում էր նաև 2023 և 2024 թվականներին՝ Գազայի ցեղասպանությանը զուգահեռ։
Պատմություններ
