Էկոնոմիկայի նախարարությունը պարզաբանել է հեղուկ գազի շուրջ ստեղծված իրավիճակը

Լարսի անցակետում առաջացած կուտակումների և լոգիստիկ ժամանակավոր դժվարությունների պատճառով հեղուկ գազ տեղափոխող որոշ բեռնատարների մուտքը Հայաստան ուշացել է, ինչն ազդել է շուկայում մատակարարումների բնականոն ռիթմի վրա։ Այս մասին հայտնել է Հայաստանի էկոնոմիկայի նախարարությունը՝ պարզաբանելով հեղուկ գազի մատակարարման շուրջ ստեղծված իրավիճակը։ Ըստ պաշտոնական տեղեկատվության՝ խոսքն ամբողջական դեֆիցիտի մասին չէ, սակայն առանձին լցակայաններում հնարավոր են մատակարարման ժամանակավոր ընդհատումներ։

«Պատասխանատու պետական մարմինները մշտական կապի մեջ են ներմուծող ընկերությունների և գործընկեր կառույցների հետ՝ իրավիճակը հնարավորինս արագ կարգավորելու և շուկայի բնականոն մատակարարումը վերականգնելու նպատակով»,- ասված է պարզաբանման մեջ։

Ըստ գերատեսչության՝ գների վրա կարող են ազդեցություն ունենալ ոչ միայն լոգիստիկ դժվարությունները, այլև տարածաշրջանային զարգացումներով պայմանավորված միջազգային շուկայի տատանումները։

«Միաժամանակ, շուկան գտնվում է մշտադիտարկման ներքո, և պատկան մարմինները հետևում են իրավիճակին՝ բացառելու անհիմն գնաճն ու հնարավոր սպեկուլյատիվ դրսևորումները»։

Վերջին օրերին հեղուկ գազի գինը կտրուկ բարձրացել է՝ հասնելով 300 դրամի, բացի այդ, գազալցակայաններից շատերում հեղուկ գազը բացակայում է։

Հիմնական լուսանկարն ստեղծվել է արհեստական բանականության օգնությամբ