Հայ դատի գրասենյակը մտահոգություն է հայտնել․ Արցախը դուրս է մնացել ԵՄ-ՀՀ քննարկումներից

Հայ դատի Եվրոպայի գրասենյակը խոր մտահոգություն և հիասթափություն է արտահայտել Երևանում անցկացված ԵՄ-Հայաստան առաջին գագաթնաժողովի պաշտոնական քննարկումներից Արցախի ամբողջական բացակայության վերաբերյալ։ Այս մասին տեղեկանում ենք Հայ դատի կենտրոնական գրասենյակի տարածած հաղորդագրությունից։ 

«Հայ դատի Եվրոպայի գրասենյակը խոր մտահոգություն և հիասթափություն է արտահայտում գագաթնաժողովի պաշտոնական քննարկումներից Արցախի ամբողջական բացակայության վերաբերյալ, չնայած Եվրոպական խորհրդարանի հստակ մանդատին (2026-ի ապրիլի 30-ի բանաձև), որը բացահայտորեն՝

1. դատապարտում է Լեռնային Ղարաբաղի հայ բնակչության էթնիկ զտումը,

2. պահանջում է Բաքվում պահվող հայ պատանդների և ռազմագերիների անհապաղ ազատ արձակում,

3. կոչ է անում պաշտպանել և միջազգային մոնիթորինգի ենթարկել Ադրբեջանի կողմից ներկայումս ոչնչացվող հայկական մշակութային և կրոնական ժառանգությունը։

Գագաթնաժողովի համատեղ հռչակագիրը լուռ մնաց այս գոյաբանական խնդիրների վերաբերյալ»,- ասված է հաղորդագրության մեջ։ 

Հայ դատի Եվրոպայի գրասենյակից նշում են, որ այս բացթողումը կտրուկ հակասություն է Եվրոպական խորհրդարանի կոչին՝ արդարության և միջազգային երաշխիքների ներքո Արցախի տեղահանված ժողովրդի վերադարձի իրավունքի վերաբերյալ։

«Հայ դատի Եվրոպայի գրասենյակը համաձայն է Եվրոպական խորհրդարանի հետ, որ «ժողովրդավարական դիմակայունությունը» չի կարող գոյություն ունենալ վակուումում։ Եթե ԵՄ-ն պետք է լինի իրական ռազմավարական գործընկեր, ապա այն պետք է գործի իր իսկ ժողովրդավարական մանդատների հիման վրա։ Մենք կոչ ենք անում Եվրոպական հանձնաժողովին դուրս գալ ենթակառուցվածքային պլանավորման շրջանակներից և ձեռնարկել կոնկրետ քայլեր՝ Ադրբեջանին իր հանցագործությունների համար պատասխանատվության ենթարկելու ուղղությամբ։ Ռազմավարական կապակցվածությունը չպետք է իրականացվի իրենց հայրենական տներից էթնիկ զտման ենթարկված 150000 հայերի համար արդարություն ապահովելու հաշվին»,- ասված է հաղորդագրության մեջ։

Մայիսի 5-ին Երևանում կայացել է ԵՄ-Հայաստան առաջին գագաթնաժողովը, որին մասնակցել են Եվրոպական խորհրդի նախագահ Անտոնիու Կոշտան և Եվրոպական հանձնաժողովի նախագահ Ուրսուլա ֆոն դեր Լայենը։