«Ուժեղ Հայաստան» կուսակցության առաջնորդ Սամվել Կարապետյանը նախընտրական քարոզարշավին մասնակցելու է տանից։ Այս մասին մայիսի 8-ին լրագրողներին հայտնել է «Ուժեղ Հայաստան» կուսակցության խորհրդի անդամ Նարեկ Կարապետյանը։
«Հանրային ելույթները հիմնականում տանից և տնային կալանքից է լինելու, ցավոք դա այդպես է։ Բայց մենք այդ վիճակում ենք, որ երկրի իշխանությունը հատել է նաև այդ սահմանը»,- ասել է Նարեկ Կարապետյանը։
Այսօր՝ մայիսի 8-ին, մեկնարկել է Ազգային ժողովի ընտրությունների քարոզարշավը։
«Ուժեղ Հայաստան» կուսակցության առաջնորդ Սամվել Կարապետյանը գտնվում է տնային կալանքի տակ։ Դեկտեմբերի 30-ին բանտային կալանքը փոխարինվել էր տնային կալանքով, 4 մլրդ դրամ գրավով և այլ սահմանափակումներով: Ապրիլին ևս երեք ամսով երկարաջգվել է Կարապետյանի խափանման միջոց տնային կալանքը։
2025-ի հունիսի 17-ին Սամվել Կարապետյանի տանը խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն: Նա կալանավորվեց հունիսի 18-ին՝ իշխանությունը զավթելուն կամ սահմանադրական կարգը բռնի տապալելուն ուղղված հրապարակային կոչ անելու մեղադրանքով։ Ժամանակի ընթացքում նրա մեղադրանքին ավելացվեց հարկերը չվճարելն ու առանձնապես խոշոր չափերով փողերի լվացումը, ինչը նրա փաստաբանները հերքում են և հայտարարում, որ նա կալանավորվել է բացառապես հարցազրույցի համար, որում պաշտպանել է Եկեղեցուն։
Սամվել Կարապետյանն «Ուժեղ Հայաստան» կուսակցության վարչապետի թեկնածուն է՝ 2026-ի խորհրդարանական ընտրություններում։
Պատմություններ
