«Որոշ տեղերում կարող է հարցեր լինեն, բայց ընդհանուր առմամբ ամբողջ սպեկտրը հաշվի առնելով ճգնաժամ չեմ տեսնում Հայաստան-Ռուսաստան հարաբերություններում»,- այս մասին Հաղթանակ զբոսայգում լրագրողների հետ զրույցում ասել է Անվտանգության խորհրդի քարտուղար Արմեն Գրիգորյանը։
Նա շեշտել է, որ Հայաստան-Ռուսաստան հարաբերությունները լայն օրակարգ ունեն և, ընդհանուր առմամբ, ճգնաժամ չի տեսնում հարաբերություններում։
Հարցին, թե Ռուսաստանի Դաշնությունից տարբեր մակարդակով հայտարարություններ են հնչել, օրինակ, Ուկրաինայի նախագահին Հայաստանում հարթակ տրամադրելուն, Գրիգորյանն ասաց, որ իրենք միջազգային մակարդակի համաժողով են Հայաստանում կազմակերպել և հետևել են այդ համաժողովի ֆորմատին համապատասխան բոլոր գործընթացներին։
Հարցին, որ մայիսի 8-ին վարչապետը հայտարարել է, որ Ղարաբաղյան շարժումը ճակատագրական սխալ է եղել, ինչպես կմեկնաբանի, Գրիգորյանն ասաց․
«Ճիշտ կլինի վարչապետին այդ հարցերը տաք, բայց ընդհանուր առմամբ այն իրականությունը, որ մենք այսօր ունենք, ցույց է տալիս հենց վարչապետի հայտարարության տրամաբանությունը, որովհետև եթե այդ ճանապարհը, որ մենք ընտրել ենք, արդյունավետ լիներ, այսօր մենք այս արդյունքը չէինք ունենա»։
Պատմություններ
