«Եթե վերցնենք Եվրոպական Միությանն ու ԵԱՏՄ-ին ամբողջական անդամակցությունը, պարզ է, որ այստեղ հարց է առաջանալու․ մի օր կքննարկենք, կորոշենք, երբ որ այդ օրը գա»․ այս մասին մայիսի 23-ին քարոզարշավի ընթացքում ասաց արտգործնախարար Արարատ Միրզոյանը՝ պատասխանելով News.am-ի հարցերին։
Մայիսի 22-ին Ռուսաստանի արտգործնախարարն ասել էր, որ Արևմուտքը փորձում է Հայաստանին ներքաշել հակառուսական ճամբար՝ Ռուսաստանին «որքան հնարավոր է շատ ցավ» պատճառելու նպատակով։ Մայիսի 9-ին էլ ՌԴ նախագահ Վլադիմիր Պուտինն ասել էր, որ Հայաստանը պետք է հնարավորինս շուտ որոշում կայացնի՝ ԵՄ-ին անդամակցության շուրջ։ Ռուսական կողմը վերջին օրերին Հայաստանից ներմուծվող որոշ ապրանքների նկատմամբ սահմանափակումներ է մտցնում։
«Մենք մեր ինքնիշխան որոշումներն ենք կայացնում․ շահագրգռված ենք Ռուսաստանի հետ գործընկերությունը պահպանելուն և զարգացնելուն։ Հիմա, եթե այդպիսի հարաբերություններն այս կամ այն պաշտոնյային դուր չի գալիս, պետք է խոսել, հասկանալ, փորձել բացատրել, որ սա գործընկերային է և հակառակը՝ գործընկերային չի»,- նշել է նախարարը։
Միրզոյանը հերքել է նաև Ռուսաստանի արտգործնախարար Սերգեյ Լավրովի այն պնդումը, թե Հայաստանը Արևմուտքի կողմից օգտագործվում է Ռուսաստանի դեմ։
«Մեր և Միացյալ Նահանգների ռազմավարական գործընկերությունը, մեր և Եվրոպական Միության ռազմավարական օրակարգը որևէ կերպ ուղղված չեն Ռուսաստանի դեմ»,- ասել է նա՝ ընդգծելով, որ Հայաստանի միջազգային գործընկերությունները միտված են փոխշահավետ համագործակցությանը։
Միզոյանի խոսքով՝ Երևանը շահագրգռված է Ռուսաստանի հետ գործընկերային հարաբերությունների պահպանմամբ և զարգացմանմամբ, սակայն շարունակելու է նաև խորացնել հարաբերություններն այլ երկրների ու կառույցների հետ։
Նա վերահաստատել է, որ Հայաստանը շարունակում է Եվրոպական Միության հետ մերձեցման քաղաքականությունը։ Միաժամանակ նա նշեց, որ լիարժեք անդամակցության հարցի դեպքում ապագայում կարող է առաջանալ քննարկում՝ Եվրասիական տնտեսական միությունում Հայաստանի անդամակցության վերաբերյալ։
Պատմություններ
