Հայաստանում համապետական ընտրություններին և հանրաքվեներին կարող են մասնակցել միայն այն քաղաքացիները, որոնք նախորդող մեկ տարվա ընթացքում առնվազն 6 ամիս բնակվել են երկրում։ Իշխող «Քաղաքացիական պայմանագիր» խմբակցությունը նման օրենսդրական փոփոխությունների փաթեթ է դրել շրջանառության մեջ։ Նախագծի հեղինակներն են պատգամավորներ Արուսյակ Մանավազյանը և Ալխաս Ղազարյանը։
Ըստ առաջարկի՝ քաղաքացին ընտրության կամ հանրաքվեի օրվան նախորդող 365 օրվա ընթացքում պետք է փաստացի 183 և ավելի օր գտնված լինի Հայաստանում։ Այս ժամկետը հաշվարկվելու է հանրաքվեի կամ քվեարկության օրվան նախորդող 48-րդ օրվա, իսկ արտահերթ ընտրությունների կամ նոր քվեարկության դեպքում՝ 28-րդ օրվա դրությամբ։
Պատգամավորները նախաձեռնությունը հիմնավորում են պետության և քաղաքացու միջև իրական սոցիալական ու տնտեսական կապի ապահովման անհրաժեշտությամբ։ Ըստ հեղինակների՝ ընտրությունները պետք է արտացոլեն այն անձանց կամքը, որոնք իրապես գտնվում են պետության որոշումների ազդեցության տիրույթում և պատրաստ են կրել ձևավորված իշխանության գործունեության հետևանքները։
Այս օրենսդրական քայլը հաջորդում է հունիսի 7-ի խորհրդարանական ընտրությունների ընթացքում ծավալված քննարկումներին։ Մամուլի հրապարակումների համաձայն՝ Ռուսաստանը փորձել էր ազդել քվեարկության արդյունքների վրա՝ կազմակերպելով արտերկրում բնակվող ՀՀ քաղաքացիների ժամանումը Հայաստան՝ ընդդիմադիր «Ուժեղ Հայաստան», «Հայաստան» դաշինքների և «Բարգավաճ Հայաստան» կուսակցության օգտին քվեարկելու նպատակով։ Իշխող քաղաքական ուժը խոստացել էր ընտրություններից հետո օրենսդրական կարգավորում տալ այս խնդրին։
Պատմություններ
