Հուլիսի 1-ից մի շարք ապրանքների ներմուծման մաքսային կանոնները կխստացվեն

Հայաստանում հուլիսի 1-ից երրորդ երկրներից որոշ ապրանքներ ներմուծելիս մաքսատանը պետք է պարտադիր ներկայացնել դրանց որակն ու անվտանգությունը հաստատող փաստաթուղթ, հայտնել են Պետական եկամուտների կոմիտեից։

Նոր կարգավորումը տարածվում է օծանելիքակոսմետիկական արտադրանքի, մրգային ու բանջարեղենային հյութերի, հատուկ նշանակության և դիետիկ սննդամթերքի, ծխախոտի, ինչպես նաև փաթեթավորված խմելու և բնական հանքային ջրերի վրա։

ՊԵԿ-ը հստակեցրել է, որ նշված ապրանքների տեխնիկական կանոնակարգերը նոր չեն և արդեն իսկ գործում են Եվրասիական տնտեսական միության (ԵԱՏՄ) տարածքում։ Սույն որոշմամբ փոխվում է միայն վարչարարությունը, ըստ որի՝ հուլիսի 1-ից համապատասխանության գնահատման փաստաթուղթը պետք է պարտադիր ներկայացվի նաև մաքսային մարմիններին՝ հայտարարագրման փուլում։ Հարկային և մաքսային գերատեսչությունը հորդորել է ներմուծողներին նախապես ձեռք բերել անհրաժեշտ փաստաթղթերը՝ սահմանային ձևակերպումների ձգձգումներից խուսափելու համար։