ՔՊ-ն այսօր փակ գաղտնի քվեարկությամբ կընտրի ԱԺ նախագահին

«Քաղաքացիական պայմանագիրն» այսօր փակ գաղտնի քվեարկությամբ կընտրի Ազգային ժողովի նախագահին։ Այս մասին հայտնել է վարչապետ Նիկոլ Փաշինյանը հունիսի 25-ին կառավարությունում ճեպազրույցի ժամանակ։  

««Քաղաքացիական պայմանագիր» կուսակցությունն այսօր նիստ է անցկացնելու, որի ժամանակ փակ գաղտնի քվեարկությամբ առաջադրված թեկնածուներից ընտրելու են Ազգային ժողովի նախագահին։ Դրա մասին հանրային իրազեկում կլինի։ Առաջադրված է երեք թեկնածու, ընտրությունը երեք թեկնածուի միջև կլինի»,- ասել է վարչապետը։ 

Ըստ մամուլում շրջանառվող տեղեկությունների՝ ԱԺ նախագահի հավանական թեկնածուներն են՝ գործող ԱԺ նախագահ Ալեն Սիմոնյանը, Ռուբեն Ռուբինյանը և Հայկ Կոնջորյանը։

Անդրադառնալով կառավարության կազմի փոփոխություններին, վարչապետը նշել է, որ նախարարների և փոխնվարչապետերի փոփոխություն չի նախատեսում:

«Այլ մակարդակներում, որոշ փոփոխություններ մտածում եմ՝ տեղի կունենան»,- ասել է վարչապետը։ 

Հունիսի 7-ի խորհրդարանական ընտրություններին «Քաղաքացիական պայմանագիրը» ստացել է 49,7 տոկոս քվե։