ԲՀԿ ներկայացուցիչ, փաստաբան Արամ Օրբելյանը Սահմանադրական դատարանում միջնորդություն է ներկայացրել՝ վիճարկելով դատարանի կազմի իրավաչափության և սահմանադրականության հարցը Ազգային ժողովի ընտրությունների արդյունքների վերաբերյալ գործի շրջանակներում։ Միջնորդությունը վերաբերում է «Սահմանադրական դատարանի մասին» օրենքի 16-րդ հոդվածին, որով կարգավորվում է դատարանի իրավազորությունը:
Ըստ Օրբելյանի՝ խնդիրը վերաբերում է դատարանի կազմին և այն հարցին, թե որքանով է իրավաչափ գործի քննությունը ոչ ամբողջական կազմով։ Նա նշել է, որ այս փուլում իրենք բարձրացնում են հենց դատարանի կազմի սահմանադրականության հարցը, քանի որ նորմերի սահմանադրականության աբստրակտ վիճարկման սուբյեկտ տվյալ պահին չեն հանդիսանում։
Սահմանադրական դատարանը որոշել է հետաձգել այս միջնորդության քննարկումը, քանի դեռ դրա բովանդակությունը հասանելի չի դարձել դատավարության բոլոր կողմերին և դատավորներին։ Դատարանն ընդգծել է, որ անհրաժեշտ է պահպանել կողմերի դատավարական իրավունքները, որպեսզի ցանկացած քննարկում լինի լիարժեք և բովանդակային։
Սահմանադրական դատարանը հունիսի 26-ին բանավոր ընթացակարգով քննում է ԱԺ ընտրությունների արդյունքները բողոքարկող 7 քաղաքական ուժերի դիմումները:
«Սահմանադրական դատարանը հունիսի 21-ի աշխատակարգային նիստում քննության է ընդունել ««Ուժեղ Հայաստան» կուսակցությունների դաշինքի, «Միասնության թևեր» կուսակցության, «Դեմոկրատիա Օրենք Կարգապահություն» կուսակցության, «Բարգավաճ Հայաստան» կուսակցության, «Հանուն Հանրապետության ժողովրդավարության պաշտպանների դաշինք» կուսակցության, «Հայաստան» կուսակցությունների դաշինքի և «Նոր ուժ» ռեֆորմիստական կուսակցության դիմումների հիման վրա Կենտրոնական ընտրական հանձնաժողովի 2026-ի հունիսի 14-ի «Հայաստանի Հանրապետության Ազգային ժողովի 2026-ի հունիսի 7-ի հերթական ընտրությունների արդյունքներն ամփոփելու մասին» թիվ 259-Ա որոշման հետ կապված վեճի վերաբերյալ» գործերը։
Պատմություններ
