Ռուբինյանն այլևս չի բանակցի Թուրքիայի հետ ԱԺ նախագահ ընտրվելու դեպքում

Ռուբեն Ռուբինյանն այլևս չի լինի Հայաստան-Թուրքիա կարգավորման գործընթացում Հայաստանի հատուկ ներկայացուցիչ, եթե Ազգային ժողովի նախագահ ընտրվի, այս մասին լրագրողներին հայտնել է Ռուբինյանը հուլիսի 3-ին ԱԺ-ում ճեպազրույցի ժամանակ։

«Քանի որ ես ԱԺ նախագահի թեկնածու եմ ընտրվել, ընտրվելու դեպքում ես չեմ շարունակելու Թուրքիայի հետ բանակցություններում Հայաստանի հատուկ ներկայացուցիչ լինել»,- ասել է Ռուբինյանը։

Ռուբեն Ռուբինյանն Ազգային ժողովի նախագահի թեկնածու է ընտրվել հունիսի 25-ին «Քաղաքացիական պայմանագիր» կուսակցության վարչության նիստում փակ գաղտնի քվեարկության արդյունքում: 

Հայաստան-Թուրքիա կարգավորման գործընթացը մեկնարկել է 2022-ի սկզբին, երբ Հայաստանի ներկայացուցիչ Ռուբեն Ռուբինյանն ու Թուրքիայի ներկայացուցիչ Սերդար Քըլըչը առաջին անգամ հանդիպեցին Մոսկվայում։ 2022-ի հուլիսին նրանք պայմանավորվել էին սահմանը բացել երրորդ երկրների քաղաքացիների և դիվանագիտական անձնագիր ունեցող անձանց համար, սակայն այդ պայմանավորվածությունը մինչ օրս կյանքի չի կոչվել։