Միջազգային իրավական հարցերով ներկայացուցչի գրասենյակի նախկին ղեկավար Լիպարիտ Դրմեյանն արձագանքել է վարչապետ Նիկոլ Փաշինյանի՝ իր հասցեին հնչեցրած մեղադրանքներին։
«Այսօր տեղեկացա, որ կառավարության նիստից հետո «Կառավարությունը ես եմ»-ը հիշել էր ինձ։ Մի կողմ թողնենք այն, որ ներկայացված փաստերը իրականության հետ ոչ մի աղերս չունեն և դրանք «Կառավարությունը ես եմ»-ը դեռ ստիպված է լինելու հերքել»,- ֆեյսբուքյան իր էջում գրել է Դրմեյանը։
Հուլիսի 30-ին կառավարությունում ճեպազրույցի ժամանակ Փաշինյանը հրապարակայնորեն հանցագործության մասին հաղորդում է ներկայացրել Դրմեյանի դեմ, որից հետո Գլխավոր դատախազությունն ընթացք է տվել հաղորդմանը։ Վարչապետի անուղղակի «մեղադրանքի» հիմքում «Հայաստանի էլեկտրական ցանցեր» ընկերության նախկին սեփականատերերի հետ արբիտրաժային վեճն է։ Ըստ վարչապետի՝ պաշտոնավարման ընթացքում Դրմեյանը հնարավոր է սպասարկել է մասնավոր ընկերության շահերը, տեղեկատվություն է արտահոսել լրատվական ու քաղաքական շրջանակներին և կազմել փաստաթղթեր, որոնք ուղղակիորեն հակասել են կառավարության պաշտոնական դիրքորոշմանը։
«Որևէ մեկի անմեղության կանխավարկածը չեմ ուզում խախտել, բայց ես կարծում եմ, որ Կոռուպցիայի կանխարգելման հանձնաժողովը, իրավապահ մարմիններն էլ պետք է քննարկեն։ Ո՞նց կարող է պարզվել, որ այս շենքում մասնավոր ընկերության շահերը սպասարկող մարդ է եղել», - հայտարարել է Փաշինյանը։
Լիպարիդ Դրմեյանն ի պատասխան նշել է, որ իր պաշտոնավարման ժամանակ ինքը գործել է հանուն մեկ սուբյեկտի և այդ մեկ սուբյեկտը Հայաստանի Հանրապետությունն է։
«Զավեշտն այն է, որ այս ամենը հետևում է իմ քաղաքական ակտիվությանը։ Ավելին, այս ամենը հետևում է Սահմանադրական դատարանում մեր ներկայացրած փաստարկներին, որոնք ուղղակիորեն ցույց էին տալիս, թե ֆինանսական, ադմինիստրատիվ եւ ռեպրեսիվ ինչպիսի միջոցներ էին կիրառվել ՔՊ-ի կողմից ընտրությունների ամբողջ ընթացքում։
Իրավունքը և արդարությունը գերակայելու են, իսկ հանրությունը տեսնելու է, որ «Կառավարությունը դու չես»»,- գրել է Դրմեյանը։
Դրմեյանի և կառավարության միջև հակասությունը հրապարակային էր դարձել, երբ Դրմեյանի ղեկավարած գրասենյակը դիրքորոշում էր հայտնել, թե Ստոկհոլմի արտակարգ արբիտրի վճիռները պարտադիր կատարման ենթակա են: Վարչապետն էլ պնդել էր՝ կառավարությունը չի կատարելու ՀԷՑ-ի բռնագանձման քայլերն արգելող արբիտրաժի հրատապ որոշումը։
«Կառավարությունը ես եմ: Ոչ ոք չի կարող իմ դիրքորոշմանը հակասող դիրքորոշում ունենալ: Եթե կառավարությունում մարդիկ կան, որ իմ դիրքորոշմանը հակասող դիրքորոշում ունեն, թող դիմում գրեն շենքից դուրս գան, եթե՝ ոչ, ես իրենց կհանեմ»,- 2025-ի օգոստոսին կառավարությունում ճեպազրույցի ժամանակ ասել էր Փաշինյանը։
Այս հայտարարությունից հետո վարչապետի որոշմամբ Դրմեյանն ազատվել էր պաշտոնից։
Լիպարիտ Դրմեյանը հունիսի 7-ին «Միասնության թևեր» կուսակցության ցուցակով մասնակցում էր խորհրդարանական ընտրություններին։ Այդ ուժին Փաշինյանն անվանում է «եռագլուխ կուսակցության պոչ»։
Պատմություններ
