«Սեպտեմբերին պատերազմ չի սպասվում»․ Ռուբինյանը՝ Փաշինյանի նախընտրական հայտարարության մասին

Ազգային ժողովում ՔՊ խմբակցության պատգամավոր Ռուբեն Ռուբինյանը հայտարարեց, որ սեպտեմբերին պատերազմ չի սպասվում՝ պատասխանելով ընդդիմադիր պատգամավոր Աննա Գրիգորյանի հարցին։

Քարոզարշավի ընթացքում Նիկոլ Փաշինյանը բազմիցս ընտրությունները ներկայացրել էր որպես խաղաղության և պատերազմի միջև ընտրություն․ «Լինելու է պատերազմ սեպտեմբերին ու աղետաբեր պատերազմ, եթե «Քաղաքացիական պայմանագիր» կուսակցությունը սահմանադրական մեծամասնություն չստանա»,- հայտարարել էր Փաշինյանը։

Հունիսի 7-ի ընտրությունների արդյունքներով «Քաղաքացիական պայմանագիրը» չստացավ սահմանադրական մեծամասնություն։

Օգոստոսի 2-ին՝ ԱԺ 9-րդ գումարման առաջին նիստում Ռուբինյանն ասաց՝ ՔՊ-ն երբեք չի պնդել, թե պատերազմ կլինի միայն այն պատճառով, որ կուսակցությունը սահմանադրական մեծամասնություն չստանա։ Նա նշեց, որ իշխանությունը նախազգուշացրել էր պատերազմի վտանգի մասին այն դեպքում, եթե ընդդիմությունը գար իշխանության և իրականացներ իր հայտարարած քայլերը, այդ թվում՝ վերանայեր խաղաղության գործընթացի շուրջ ձեռք բերված պայմանավորվածությունները։

«Ոչ, սեպտեմբերին պատերազմ չի սպասվում, որովհետև «Քաղաքացիական պայմանագիր» կուսակցությունը ստացել է վստահ մանդատ՝ շարունակելու խաղաղության գործընթացը։ Այո, սահմանադրական մեծամասնություն չենք ստացել, ինչը կարող է մի փոքր բարդացնել խաղաղության ապահովման մեր գործը, բայց ամենևին չի կանխի դա»,- ասաց Ռուբինյանը։

Ի պատասխան՝ «Հայաստան» խմբակցության պատգամավոր Աննա Գրիգորյանը պնդեց, որ Նիկոլ Փաշինյանի նախընտրական հայտարարությունը հստակ վերաբերում էր ՔՊ-ի սահմանադրական մեծամասնությանը․ «Չէր ասվում՝ եթե ընդդիմությունը գա իշխանության և այս կամ այն քայլն անի, պատերազմ կլինի։ Հայտարարությունը շատ հստակ էր»,- նշեց Գրիգորյանը։

Նրա խոսքով՝ Ռուբինյանի հայտարարությունն այն մասին, որ սեպտեմբերին պատերազմ չի սպասվում, ապացուցում է, որ իշխանությունը նախընտրական շրջանում պատերազմի վտանգով մոլորեցրել է քաղաքացիներին։

ՍիվիլՆեթը դեռ քարոզարշավի ընթացքում անդրադարձել էր ՔՊ-ի՝ «ես կամ պատերազմ» հռետորաբանությանը։