Արամ Հովհաննիսյանը նշանակվել է ՊՆ ռազմական ոստիկանության պետ

Վարչապետ Նիկոլ Փաշինյանի որոշմամբ գեներալ-մայոր Արամ Հովհաննիսյանը նշանակվել է ՊՆ ռազմական ոստիկանության պետ։

Նույն որոշմամբ Աշոտ Զաքարյանն ազատվել է այդ պաշտոնից։

Անդրադառնալով բանակում խաղաղ պայմաններում մահերի թվի աճին վարչապետ Նիկոլ Փաշինյանը հայտարարել էր, որ Ռազմական ոստիկանությունում և Զինված ուժերի բարոյահոգեբանական ապահովման վարչությունում կադրային փոփոխություններ են լինելու։

2026-ին 8 ամսվա ընթացքում ոչ մարտական պայմաններում բանակում 8 մահ է արձանագրվել։

Պաշտպանության նախարարությունը հայտնել էր, որ օգոստոսի 13-ին հայտնաբերվել է ՊՆ N զորամասի զինծառայող Գրիգոր Էդգարի Զաքարյանի դին՝ հրազենային վնասվածքով։ Զինծառայողին ինքնասպանության հասցնելու դեպքով մեկ անձ կալանավորվել է։

Արամ Հովհաննիսյանը 2023-ին նշանակվել է ՆԳ նախարարի տեղակալ, ոստիկանապետ։ 2025-ի հունիսին իր դիմումի համաձայն Հովհաննիսյանն ազատվել էր այդ պաշտոնից։