Անկախ ռուսական շուկայի հեռանկարներից Հայաստանի կառավարությունը նպատակաուղղված է շարունակել տնտեսական դիվերսիֆիկացիան, հայտնել է վարչապետ Նիկոլ Փաշինյանը՝ օգոստոսի 20-ին՝ կառավարությունում ճեպազրույցի ժամանակ։
«Այս պատմությունն ավարտվելու է դիվերսիֆիկացիայով, այսինքն եթե հենց հիմա, մի ժամից Ռուսաստանի շուկան 100 տոկոսով բացվի, միևնույն է, մենք լրացուցիչ ջանքեր ենք գործադրելու, որ դիվերսիֆիկացիան տեղի ունենա»,- ասել է վարչապետը։
Մի քանի ամիս է Ռուսաստանը տնտեսական սահմանափակումներ է կիրառում Հայաստանի նկատմամբ։ Պարբերաբար տարբեր խախտումների մասին պատճառաբանությամբ արգելվում են հայկական մթերքների, ջրերի, մրգերի, բանջարեղենների, ձկնամթերքի արտահանումը Ռուսաստան։
Վարչապետ Նիկոլ Փաշինյանը նշել է, որ Հայաստանը պատրաստ է ապահովել լիարժեք թափանցիկություն և իրականացնել համատեղ ստուգումներ Ռուսաստանի համապատասխան մարմինների հնարավոր մտահոգությունների պարագայում։
Նրա խոսքով՝ Երևանի դիրքորոշումը հիմնված է բաց և երկխոսության պատրաստակատության վրա, ինչի շրջանակում առաջարկվում է տեղում համատեղ ստուգել բոլոր մտահոգություն առաջացնող հարցերը։
Անդրադառնալով հարցի երկարաժամկետ լուծմանը՝ գործադիրի ղեկավարն ընդգծել է, որ ստեղծված իրավիճակից հնարավոր է մեկընդմիշտ ապահովագրվել բացառապես դիվերսիֆիկացիայի միջոցով։
Վարչապետը հստակեցրել է, որ այս երկու գործընթացները փոխկապակցված չեն միմյանց հետ, և շուկաների վերաբացման հեռանկարը չի նշանակում տնտեսական ուղղությունների բազմազանեցման ռազմավարության վերանայում կամ դադարեցում։
Կառավարությունն այսօր հայտնել է, որ դեպի ԵՄ երկրներ արտահանման ծավալն աճել է։ Հունվար-հունիսի դրությամբ դեպի ԵՄ արտահանման ծավալը գերազանցել է 516 մլն դոլարը, ինչը նախորդ տարվա նույն ժամանակահատվածի համեմատ (շուրջ 287 մլն դոլար) բարձր է ավելի քան 80 տոկոսով: 2026-ի առաջին կիսամյակում դեպի ԵՄ արտահանումը 2017 -ի նույն ժամանակահատվածի համեմատ (մոտ 301 մլն դոլար) աճել է ավելի քան 71%-ով։
Պատմություններ
