Արթուր Ավետիսյանը դարձել է մարմնամարզության Եվրոպայի առաջնության ոսկե մեդալակիր

Հայաստանի սպորտային մարմնամարզության հավաքականի ներկայացուցիչ Արթուր Ավետիսյանը Զագրեբում ընթացող Եվրոպայի առաջնությունում նվաճել է ոսկե մեդալ։

Խորվաթիայի մայրաքաղաքում կայացած մրցումում Ավետիսյանն օղակների վարժությունում գրանցել է 14,400 միավոր՝ արժանանալով մայրցամաքային առաջնության չեմպիոնի տիտղոսին։ Նույն մրցաձևում հանդես եկած հավաքականի մյուս անդամ Վահագն Դավթյանը վաստակել է 14,000 միավոր և եզրափակել լավագույն հնգյակը։

Առաջնության շրջանակում հայ մարմնամարզիկներն ավելի վաղ ևս երկու մեդալ էին ապահովել. Համլետ Մանուկյանը դարձել էր արծաթե մեդալակիր, իսկ Մամիկոն Խաչատրյանը բրոնզե մեդալ էր նվաճել նժույգ-թափեր վարժությունում։