«Պիղծ դավաճանի սովորական գործելաոճն է»․ Լևոն Քոչարյանը՝ իր տան խուզարկության մասին

Ավարտվել է ԱԺ «Հայաստան» խմբակցության պատգամավոր Լևոն Քոչարյանի տան խուզարկությունը։ Այն մոտ 7 ժամ է տևել։ Իրավապահ մարմինները Քոչարյանի տանից կրիչներ են առգրավել։

Լրագրողների հետ զրույցում Լևոն Քոչարյանն ասել է, որ իր համար անակնկալ չի եղել, երբ առավոտյան ժամը 7-ին ԱԱԾ աշխատակիցներն ու քննիչները իրենց տուն են գնացել։

«Ըստ երևույթի ոչ մի անակնկալ չկա այս առումով։ Պիղծ դավաճանի սովորական գործելաոճն է։ Այս ամենը կապված է մեր ընդդիմադիր գործունեությունից. այս իշխանության վարած քաղաքականության հետ համաձայն չլինելը, սրա մասին խոսելը, բարձրաձայնելը, չընկրկվելը, չնահանջելը, չկզելը - այ այս ամեն ինչի արդյունքն է։ Մենք այս ամեն ինչին պատրաստ ենք, առաջին անգամ չի, ու այս ամեն ինչը շարունակվելու է բոլոր այն մարդկանց նկատմամբ, ովքեր կփորձեն դեմ արտահայտվել այս իշխանություններին, որոնք իրենք ուսումնասիրում են»,- ասել է Լևոն Քոչարյանը։

Օգոստոսի 24-ին Խորհրդարանում հարցուպատասխանի ժամանակ Լևոն Քոչարյանը Փաշինյանին մեղադրել էր դատարանների և քննչական մարմինների վրա քաղաքական ճնշում գործադրելու մեջ՝ ասելով, որ երկրի վարչապետը չի կարող խորհրդարանի ամբիոնից որոշել, թե ով պետք է ազատազրկվի կամ զրկվի ունեցվածքից։

«Եթե երկրի վարչապետն ասում է՝ այսինչը պետք է նստի, այսինչը պետք է ունեզրկվի, սա քաղաքական պատվեր է, սա նորմալ չի։ Սա հակասում է եվրոպական ստանդարտներին, ժողովրդավարությանը»,- ասել էր Քոչարյանը։

Փաշինյանը պատասխանել էր՝ հարցնելով, թե ինչ միջոցներով է Քոչարյանների ընտանիքը դարձել միլիոնատեր։ «Դուք ինչո՞ւ եք միլիոնատեր։ Դուք ինչի՞ հաշվին եք միլիոնատեր։ Ձեր ընտանիքը ինչի՞ հաշվին է միլիոնատեր»,- ասել էր վարչապետը։

Փաշինյանը նաև հայտարարել էր, որ այդ ունեցվածքը պետք է վերադարձվի պետությանը։ «Դուք պիտի հատիկ-հատիկ ամեն ինչը վերադարձնեք Հայաստանի Հանրապետությանը, և այո, դա իմ քաղաքական առաքելությունն է, պահանջն է և պարտավորությունն է, որ ես ստանձնել եմ ժողովրդի առաջ»,- ասել էր նա։

Այսօր՝ օգոստոսի 25-ին, Երկրորդ նախագահ Ռոբերտ Քոչարյանն ու նրա ավագ որդին՝ Սեդրակ Քոչարյանը, ձերբակալվել են։

Վաղ առավոտյան հարկային մարմինները կապարակնքել են Քոչարյաններին պատկանող մի շարք ընկերություններ։ Խուզարկություններ են ընթանում նրանց պատկանող ընկերություններում։