Զինվորների վրաերթի գործով զինվորական պաշտոնյա է ձերբակալվել․ ՔԿ

Ճամբարակ-Վահան ճանապարհին օգոստոսի 19-ին տեղի ունեցած վրաերթի գործով իշխանությունը չարաշահելու մեղադրանքով ձերբակալվել է մեկ անձ, հայտնում են Քննչական կոմիտեից։

Օգոստոսի 19-ին ժամը 21:00-ի սահմաններում Ճամբարակ քաղաք տանող ավտոճանապարհին «Գազ-53» մակնիշի ավտոմեքենան վրաերթի է ենթարկել մի քանի զինծառայողի։ Նրանցից մեկը՝ Սուրեն Մամբրեի Վարդանյանը, մահացել է։

«Օգոստոսի 19-ին Ճամբարակ-Վահան ճանապարհին տեղի ունեցած վրաերթի դեպքի առթիվ նախաձեռնված քրեական վարույթի շրջանակում 1 անձի նկատմամբ հարուցվել է հանրային քրեական հետապնդում՝ Քրեական օրենագրքի 549-րդ հոդվածի 3-րդ կետով (իշխանազանցությունը կամ իշխանությունը չարաշահելը): Վերջինս ձերբակալվել է՝ դատարան ներկայացվելու նպատակով»,- ասվածէ ՔԿ հաղորդագրության մեջ:

Դեպքից հետո հանրային քրեական հետապնդում էր հարուցվել նաև տրանսպորտային միջոցի վարորդի նկատմամբ, որը կալանավորվել է:

Armlur-ը հայտնում է, որ ձերբակալվածը Ճամբարակի զորամասի գումարտակի շտաբի պետն է։