Հայաստանի բուհերն ու ավագ դպրոցները սեպտեմբերից կկիրառեն ԱԲ կրթական գործիքներ․ նախարար

Հայաստանի ավագ դպրոցներն ու բուհերը սեպտեմբերից լայնորեն կկիրառեն արհեստական բանականության կրթական գործիքներ։ Այս մասին օգոստոսի 28-ին՝ ասուլիսի ժամանակ հայտնել է ԿԳՄՍ նախարար Ժաննա Անդրեասյանը։

ԿԳՄՍ նախարարության, OpenAI-ի և Firebird-ի հետ համագործակցությամբ կտրամադրվի 50,000 բաժանորդագրություն՝ ուսումնական հաստատությունների համար հասանելի դարձնելով ChatGPT Edu հարթակը։

«Հանրակրթության պարագայում խոսում ենք բացառապես ավագ դասարանների մասին: Կա ChatGPT Edu գործիքակազմը, որը նախատեսված է հենց կրթական գործընթացներին աջակցելու համար»,- ասել է նախարարը։

Նախարարը հայտնել է, որ արհեստական բանականությունը կօպտիմալացնի ուսումնական հաստատությունների վարչական և մանկավարժական աշխատանքը։ Տնօրենները կկարողանան վերլուծել աշակերտների առաջադիմությունն ու հաճախելիությունը, իսկ ուսուցիչները՝ ավտոմատացնել թեստերի ու պլանների կազմումը՝ խնայված ժամանակն ուղղելով ստեղծագործական գործընթացին։

«Պատկերացրեք, որ դպրոցի տնօրենը, որն էլեկտրոնային մատյանում տեսնում է երեխաների գնահատականներն ու բացակայությունները, արհեստական բանականության միջոցով կկարողանա նաև վերլուծություններ անել՝ հասկանալու խոցելի տեղերն ու այն ուղղությունները, որոնց վրա պետք է մեծ ուշադրություն դարձնի։ Ուսուցիչներն էլ հնարավորություն կունենան ազատել իրենց ժամանակը մեխանիկական աշխատանքից և կենտրոնանալ ստեղծագործական աշխատանքի վրա։ Գործիքակազմը կարող է օգնել թեստերի կազմմանն ու թեմատիկ պլանավորմանը»,- ասել է նախարարը։

Համակարգի անխափան գործարկման համար ԿԳՄՍ նախարարությունը կիրականացնի լայնամասշտաբ վերապատրաստումներ։ Կտրամադրվեն ուղեցույցներ և տեսանյութեր, որպեսզի կրթական համակարգը կարողանա ճիշտ կիրառել նոր տեխնոլոգիաները՝ խուսափելով հնարավոր ռիսկերից և այն ծառայեցնելով կրթության որակի բարձրացմանը։

«Առաջիկայում կտրամադրվեն համապատասխան ուղեցույցներ և տեսանյութեր, որոնք կբարձրացնեն կրթական համակարգում այս գործիքների օգտագործման արդյունավետությունը: Պլանավորել ենք վերապատրաստումների մեծ գործընթաց: Կրթական համակարգը պետք է սովորի առնչվել արհեստական բանականության հետ: Դա իրողություն է, և միայն գրագետ ու մտածված լուծումներն են, որոնք կկարողանան այդ գործիքակազմը ծառայեցնել հանուն որակյալ կրթության, այլ ոչ թե բերել նոր մարտահրավերներ, որոնց այսօր հանդիպում է կրթական համակարգն ամբողջ աշխարհում»,- ասել է Անդրեասյանը։