Առուշ Առուշանյանը ոչ թե «Քաղաքացիական պայմանագիր» կուսակցության ցուցակով է հանդես գալու, այլ «Քաղաքացիական պայմանագիրը» դաշինք է ձևավորելու այն կուսակցության հետ, որով առաջադրվելու է Առուշ Առուշանյանը: Այս մասին սեպտեմբերի 11-ին կառավարությունում ճեպազրույցի ժամանակ հայտարարել է վարչապետ Նիկոլ Փաշինյանը։
«Մենք գնացել ենք Գորիսում ընտրությունների համատեքստում կրկնակի լարվածություններ չառաջացնելու տրամաբանությամբ, և այո, այս որոշման հեղինակը գորիսցիներն են առաջին հերթին իրենց քվեարկություններով։ Մենք որոշել ենք այո, գնալ համերաշխության ճանապարհով, ոչ թե ՔՊ-ի կամ Առուշ Առուշանյանի սիրույն, այլ Գորիսի քաղաքացիների սիրույն, ցույց տալով, որ մենք նաև լսում ենք իրենց ձայնը, ինչքան էլ դժվար լինի»,- ասել է վարչապետը։
Փաշինյանը մանրամասնել է, որ 2021-ի համապետական ընտրություններում Գորիսը քվեարկել է իշխող կուսակցության օգտին, մինչդեռ տեղական ինքնակառավարման մարմինների ընտրություններում նախապատվությունը տվել է Առուշ Առուշանյանին։ Նրա խոսքով՝ այս հակասությունը, որի հեղինակը հենց ժողովուրդն է, ստեղծում է մշտական լարվածություն։
«Սա այն դեպքն է, երբ որ ինչ-որ առումով նաև ժողովրդի և գորիսցիների պարտադրանքին ենք ենթարկվել: Այս ընտրություններում էլ Գորիսը քվեարկել է քաղաքացիական պայմանագիր կուսակցության օգտին: Եվ մենք այդ ազդակները անընդհատ նաև Գորիսից ենք ստանում, որ ինչու եք անընդհատ բախման տրամաբանությամբ պրոցեսներ գեներացնում Գորիսում»,- ասել է Փաշինյանը:
Առուշ Առուշանյանը Գորիս համայնքի գործող ղեկավարն է։
Գորիսում ՏԻՄ ընտրություններ կանցկացվեն հոկտեմբերի 25-ին:
Առուշ Առուշանյանը Գորիս համայնքը ղեկավարում է 2017-ի նոյեմբերից։
2021-ի հուլիսին նա կալանավորվել է։ Նրան մեղադրանք է առաջադրվել պաշտոնեական լիազորությունները չարաշահելու, ընտրություններին մասնակցելուն կամ քվեարկելուն հարկադրելու, ինչպես նաև ապօրինի ձեռնարկատիրական գործունեության և այլ դրվագներով։
2021-ի հոկտեմբերի 21-ին կալանքի տակ գտնվող Առուշ Առուշանյանը հաղթել էր Գորիսում անցկացված համայնքապետի ընտրություններում։
2022-ի մարտին դատարանի որոշմամբ նրա նկատմամբ ընտրված խափանման միջոց կալանավորումը փոխվել է, և նա ազատ է արձակվել գրավի դիմաց։
Պատմություններ
