Հայաստանի և Ադրբեջանի ղեկավարների վերջին հանդիպումն անցել է շատ կառուցողական մթնոլորտում. հայտարարել է Ադրբեջանի նախագահի օգնական Հիքմեթ Հաջիևը։ Ադրբեջանական APA-ի հաղորդմամբ՝ վերջինս այդ մասին խոսել է սեպտեմբերի 11-ին Ստեփանակերտում դիվանագիտական ներկայացուցիչների հետ հանդիպմանը։
«Ես շատ ուրախ եմ, որ Հայաստանի և Ադրբեջանի ղեկավարների վերջին հանդիպումն անցել է շատ կառուցողական մթնոլորտում։ Երկու կողմերը համաձայնել են առաջ տանել խաղաղության օրակարգն ու երկրների միջև ամրապանդել փոխվստահության մթնոլորտը», - հայտարարել է Հաջիևը և նշել, որ համաձայնությունը վերաբերում է նաև երկու երկրների և ավելի լայն տարածաշրջանային համատեքստում տնտեսական, առևտրային և մշակութային հարաբերությունների զարգացմանը, այդ թվում՝ տրանսպորտային կապերին։
«Մենք սովորում ենք ապրել խաղաղության պայմաններում և շարժվում ենք այդ ուղղությամբ։ Գիտակցեցինք, որ այդ զգացումը հնարավոր չէ արտահայտել բառերով։ Խաղաղությունը նաև տեղերում վերականգնման աշխատանքներից է սկսվում, և խաղաղությունը միայն հակամարտության բացակայությունը չէ»,- հայտարարել է Հաջիևը։
Հայաստանի և Ադրբեջանի ղեկավարներ Նիկոլ Փաշինյանի ու Իլհամ Ալիևը վերջին հանդիպումը տեղի է ունեցել օգոստոսի 31-ին՝ Բիշքեկում՝ Շանհայի համագործակցության կազմակերպության աշխատանքների ընթացքում։ Բացի այդ, կարճատև շփումներ են տեղի ունեցել երկու պատվիրակությունների առանձին բարձրաստիճան պաշտոնյաների միջև։
Օրերս Երևանն ու Բաքուն հայտարարել են երկու երկրների արտգործնախարարներ Արարատ Միրզոյանի և Ջեյհուն Բայրամովի առաջիկա հանդիպման մասին։ Հնարավոր հանդիպումը երկու արտգործնախարարների միջև առաջին պաշտոնական բանակցությունները կդառնան հունիսին Հայաստանում անցկացված խորհրդարանական ընրություններից հետո։
Պատմություններ
