Արարատ Միրզոյանն ԱԺ-ում կներկայացնի TRIPP-ի վավերացման մասին նախագիծը

Արտաքին գործերի և միջազգային առևտրի նախարար Արարատ Միրզոյանը նշանակվել է Ազգային ժողովում Հայաստան-ԱՄՆ TRIPP համաձայնագրի վավերացման հարցով կառավարության ներկայացուցիչ։

Համապատասխան որոշումը ստորագրել է փոխվարչապետ Մհեր Գրիգորյանը։ Փաստաթղթի համաձայն՝ Միրզոյանը խորհրդարանական քննարկումների ընթացքում կներկայացնի համաձայնագիրը վավերացնելու մասին օրենքի նախագիծը։

Հայաստանի կառավարությունը հուլիսի 16-ի նիստում հաստատել է «Թրամփի ուղի՝ հանուն միջազգային խաղաղության և բարգավաճման» (TRIPP) նախագծի վերաբերյալ ռազմավարական համագործակցության մասին շրջանակային համաձայնագիրը՝ մեկնարկելով դրա վավերացման գործընթացը։

Հաջորդ փուլով նախագիծն ուղարկվել էր Սահմանադրական դատարան։ ՍԴ-ն որոշել է, որ համաձայնագիրը չի հակասում Սահմանադրությանը։

Ըստ ընթացակարգի, այժմ նախագիծն ուղարկվելու է Ազգային ժողով՝ վավերացվելու։

Հունիսի 1-ին Վաշինգտոնում և հունիսի 4-ին Երևանում ստորագրվել է Հայաստանի Հանրապետության և Ամերիկայի Միացյալ Նահանգների միջև «Թրամփի ուղի՝ հանուն միջազգային խաղաղության և բարգավաճման» նախագծի (TRIPP) վերաբերյալ ռազմավարական համագործակցության մասին շրջանակային համաձայնագիրը:

2025-ի օգոստոսի 8-ին Վաշինգտոնում Հայաստանի վարչապետ Նիկոլ Փաշինյանը, Ադրբեջանի նախագահ Իլհամ Ալիևը և ԱՄՆ նախագահ Դոնալդ Թրամփը ստորագրել են համատեղ հռչակագիր։ Հռչակագրով հաստատվել է TRIPP նախագիծը՝ որպես տարածաշրջանային ենթակառուցվածքային ծրագիր։