Հայաստանի 4 համայնքում ՏԻՄ ընտրություններ են

Հայաստանում սեպտեմբերի 27-ին ՏԻՄ ընտրություններ են անցկացվում Լոռու մարզի Թումանյան և Լերմոնտովո, Կոտայքի մարզի Արզնի և Արմավիրի մարզի Ֆերիկ համայնքներում։

Թումանյանում ընտրություններն անցկացվում են համամասնական, իսկ մյուս երեք համայնքում՝ մեծամասնական ընտրակարգով։

Թումանյանում ավագանու ընտրություններին մասնակցում է միայն «Քաղաքացիական պայմանագիր» կուսակցությունը։ ՔՊ-ի ընտրական ցուցակը 41 թեկնածուից է բաղկացած, այն գլխավորում է գործող համայնքապետ Սուրեն Թումանյանը։

Լոռու մարզի Լերմոնտովոյում համայնքի ղեկավարի պաշտոնի համար առաջադրվել է միայն գործող համայնքապետ Էդիկ Չախալյանը։ Նա համայնքը ղեկավարում է 1997 թվականից։ Ավագանու 5 տեղի համար առաջադրվել է 6 թեկնածու։ Նրանք ինքնաառաջադրված են և որևէ կուսակցության անդամ չեն։

Արմավիրի մարզի Ֆերիկում ավագանու 5 տեղի համար առաջադրվել է 5 թեկնածու։ Նրանք ևս առաջադրվել են ինքնաառաջադրման կարգով։

Կոտայքի մարզի Արզնիում ավագանու 9 տեղի համար պայքարում է 17 թեկնածու։ Այստեղ ևս թեկնածուները ինքնաառաջադրվել են։