ՀԷՑ-ի ենթակայանի հրդեհից հետո հնարավոր է նոր ենթակայան կառուցվի. Ռոմանոս Պետրոսյան

Երևանի քաղաքապետարանի հետ աշխատանքներ են տարվում Մոնթե Մելքոնյան մայրուղու շրջակայքում հողատարածք ձեռք բերելու և բարձր լարման խոշոր, ժամանակակից ենթակայան կառուցելու ուղղությամբ։ Այս մասին լրագրողներին հայտնել է ՀԷՑ-ի ժամանակավոր կառավարիչ Ռոմանոս Պետրոսյանը՝ անդրադառնալով սեպտեմբերի 27-ին Ծիծեռնակաբերդի խճուղու էլեկտրական ենթակայանում բռնկված հրդեհի, որի հետևանքով երեկ հոսանքազրկվել էր շուրջ 5000 բաժանորդ։

«Եթե պիտանի կլինի հետագա շահագործման, ապա շաբաթների ընթացքում վերակառուցում կանենք միանշանակ և կվերազինենք արդեն նոր տրանսֆորմատորային ենթակառուցվածքներով։ Եթե շահագործման պիտանի չի լինի, ապա այս հզորությունը կբաշխենք արդեն այլ ենթակայանների միջև և այս հզորության նոր ենթակայան այս տարածքում կկառուցենք»,- ասել է Պետրոսյանը։

Պետրոսյանի խոսքով՝ դեպքից ամիսներ առաջ տվյալ հատվածում էլեկտրական բեռնվածության խնդիր է եղել։ Անդրադառնալով վթարի պատճառներին և կրակի տարածման մասշտաբներին՝ Պետրոսյանը նշել է, որ դրանք մասնագիտական հարցեր են, որոնց վերաբերյալ գնահատական կտա Փրկարար ծառայությունը, ինչպես նաև կանցկացվի էլեկտրատեխնիկական փորձաքննություն և ներքին հետաքննություն։

Պետրոսյանը նշել է, որ հրդեհը տասնյակ կամ հարյուր միլիոնավոր դրամների նյութական վնաս կարող է հասցրած լինել ընկերությանը, ինչպես նաև կարող է առաջացնել բաժանորդներին փոխհատուցելու պարտավորություն։

Սեպտեմբերի 27-ին խոշոր հրդեհ է բռնկվել Ծիծեռնակաբերդի խճուղու էլեկտրական ենթակայանում։

«Հայաստանի էլեկտրական ցանցեր»-ը բռնկված հրդեհի դեպքով հաղորդում է ներկայացրել հանցագործության մասին։