Վարչապետ Նիկոլ Փաշինյանը դատական հայց է ներկայացրել ԱԺ «Ուժեղ Հայաստան» խմբակցության պատգամավոր Էդգար Ղազարյանի դեմ։ «Դատալեքս» դատական տեղեկատվական համակարգի տվյալներով՝ հայցադիմումը Երևանի քաղաքացիական դատարան է մուտքագրվել հոկտեմբերի 1-ին և մակագրվել դատավոր Մարինա Տաշչյանին։
Նիկոլ Փաշինյանը պահանջում է պարտավորեցնել Էդգար Ղազարյանին հրապարակայնորեն հերքել 2026-ի սեպտեմբերի 27-ին տրված հարցազրույցի ընթացքում Նիկոլ Փաշինյանի հասցեին հնչեցրած արտահայտությունները։ Խոսքը պատգամավորի այն հայտարարության մասին է, թե 2020-ի հոկտեմբերի 6-ին Ստեփանակերտում անցկացրած խորհրդակցությունից հետո Փաշինյանը «սկսել է թշնամուն ուղիղ տեղեկություններ տալ»։
Ըստ դատական հայցի՝ հերքումը պետք է իրականացվի «News.am» լրատվականի ուղիղ եթերում՝ առանց հավելումների կամ մեկնաբանությունների, որտեղ պատասխանողը պետք է ընթերցի տեքստ առ այն, որ հնչեցված տեղեկությունները սուտ են և չեն համապատասխանում իրականությանը։ Փաշինյանը նաև պահանջում է Էդգար Ղազարյանից հօգուտ իրեն բռնագանձել 6 մլն դրամ՝ որպես փոխհատուցման գումար։
Պատմություններ
