Լիլիթ Ստեփանյանը կնշանակվի Կոտայքի մարզպետ

ԱԺ «Քաղաքացիական պայմանագիր» խմբակցության պատգամավոր Լիլիթ Ստեփանյանը վայր կդնի պատգամավորական մանդատը և կնշանակվի Կոտայքի մարզպետ։ Այս մասին հայտնել է վարչապետ Նիկոլ Փաշինյանը։

Ստեփանյանն այս պաշտոնում կփոխարինի Ահարոն Սահակյանին, որը հուլիսի 30-ին կառավարության որոշմամբ ազատվել է Կոտայքի մարզպետի պաշտոնից և վերցրել պատգամավորական մանդատը։

Լիլիթ Ստեփանյանը 2018-ի հուլիսից նոյեմբեր եղել է Կոտայքի մարզի Հրազդան համայնքի ղեկավարի պաշտոնակատար։ Նույն թվականի նոյեմբերից մինչև 2019-ի հունվարը զբաղեցրել է Կոտայքի մարզպետարանի կրթության, մշակույթի և սպորտի վարչության պետի պաշտոնակատարի պաշտոնը։