Վարչապետ Նիկոլ Փաշինյանը դատական հայց է ներկայացրել «Իրավունք» թերթի և «Հայկական ժամ» ֆեյսբուքյան էջերի տնօրինող Աննա Գևորգյանի դեմ։ Փաշինյանը պահանջում է հերքել իր և Աննա Հակոբյանի բաժանման պատճառների վերաբերյալ հրապարակված տեղեկությունները և վճարել 4 մլն դրամի փոխհատուցում։
Այս մասին տեղեկանում ենք «Դատալեքս» դատական տեղեկատվական համակարգից։ Հայցադիմումը Երևանի քաղաքացիական դատարան է ներկայացվել հոկտեմբերի 31-ին։
Հայցի հիմքում սեպտեմբերի 30-ին Աննա Գևորգյանի ֆեյսբուքյան էջերում և հոկտեմբերի 5-ին «Իրավունք» թերթի կայքում ու ֆեյսբուքյան էջում հրապարակված տեղեկություններն են։
Հրապարակումներում Փաշինյանի և Հակոբյանի բաժանումը կապվել է նրանց ենթադրյալ կուտակած ունեցվածքի օրինականացման հետ։
Դրանցում, մասնավորապես, պնդումներ են արվել, թե Փաշինյանն ու Հակոբյանը մեծ կապիտալ են կուտակել և փորձում են այն օրինականացնել, իսկ Աննա Հակոբյանը Փարիզի կենտրոնում 5,7 մլն եվրո արժողությամբ տուն է ձեռք բերել։ Հրապարակումներում նաև անդրադարձ է եղել նրանց ենթադրյալ ունեցվածքին, արտերկրում պահվող գումարներին և Աննա Հակոբյանի՝ Շվեյցարիա կատարած այցերին։
Փաշինյանը վիճարկում է այս տեղեկությունների իսկությունը և պահանջում, որ պատասխանողները հրապարակային հերքեն դրանք։
Հայցով պահանջվում է Աննա Գևորգյանին պարտավորեցնել հերքում հրապարակել այն ֆեյսբուքյան էջերում, որոնց միջոցով տարածվել են տեղեկությունները, իսկ «Իրավունք» թերթին՝ իր լրատվական կայքում և ֆեյսբուքյան էջում։
Բացի այդ, Փաշինյանը պահանջում է Աննա Գևորգյանից և «Իրավունք» թերթից համապարտության կարգով բռնագանձել 4 մլն դրամ՝ որպես ոչ նյութական վնասի փոխհատուցում։
Պատմություններ
