Հայաստանի և Վրաստանի սահմանազատման հանձնաժողովները վերսկսել են աշխատանքը

Նոյեմբերի 6-ին Երևանում տեղի է ունեցել Հայաստանի և Վրաստանի պետական սահմանի սահմանազատման ու սահմանագծման հարցերով հանձնաժողովների հանդիպումը։ Այս մասին հայտնում է Հայաստանի արտաքին գործերի նախարարությունը։

Հանդիպումը համանախագահել են Հայաստանի արտաքին գործերի և միջազգային առևտրի նախարարի տեղակալ Վահան Կոստանյանը և Վրաստանի արտաքին գործերի նախարարի տեղակալ Լաշա Դարսալիան։

Ըստ հաղորդագրության՝ կողմերը ողջունել են հանձնաժողովների աշխատանքների վերսկսումը և ընդգծել պետական սահմանի սահմանազատման կարևորությունը՝ Հայաստանի ու Վրաստանի բարիդրացիական հարաբերությունների հետագա ամրապնդման համար։

Նրանք երկուստեք շահագրգռվածություն են հայտնել շարունակական երկխոսության միջոցով և կառուցողական ոգով գործընթացն ավարտին հասցնելու հարցում։

Հանդիպմանը քննարկվել են գործընթացի իրավական շրջանակը, այդ թվում՝ նախկինում համաձայնեցված արձանագրությունները և հետագա հնարավոր լրացուցիչ քայլերը, որոնք կնպաստեն դրա սահուն ընթացքին։ Անդրադարձ է կատարվել նաև սահմանազատման գործընթացի շարունակականությանն ու հանձնաժողովների հետագա աշխատանքներին։