Աբու Դաբիում նոյեմբերի 10-ին մեկնարկել են Ռուսաստանի, Միացյալ Նահանգների և Ուկրաինայի եռակողմ բանակցությունները՝ պատերազմի ավարտի և անվտանգության երաշխիքների շուրջ։ ԱՄՆ միջնորդությամբ անցկացվող բանակցությունները նախատեսված են երկու օր՝ մինչև նոյեմբերի 11-ը։
Սա փետրվարից ի վեր երեք երկրների միջև բանակցությունների առաջին փուլն է։ Նախորդ հանդիպումն անցկացվել էր Ժնևում, սակայն պատերազմի ավարտի շուրջ համաձայնություն ձեռք չէր բերվել։
ԱՄՆ նախագահի հատուկ բանագնաց Սթիվ Ուիթքոֆի հայտարարության համաձայն՝ բանակցությունների օրակարգում են հետպատերազմյան անվտանգության պայմանավորվածությունները, լարվածության թուլացումը, մարդասիրական հարցերը և խաղաղության հաստատման հետագա քայլերը։
Ամերիկյան կողմը ներկայացնում են Ուիթքոֆը և ԱՄՆ նախագահի հատուկ ներկայացուցիչ Ջարեդ Քուշները։ Ռուսաստանի պատվիրակությունը գլխավորում է նախագահ Վլադիմիր Պուտինի օգնական Վլադիմիր Մեդինսկին, Ուկրաինայինը՝ Արտաքին հետախուզության ծառայության ղեկավար Ռուստեմ Ումերովը։
Reuters-ի փոխանցմամբ՝ ռուսական պատվիրակության աղբյուրը հայտնել է, որ Մոսկվան բանակցությունների հիմնական նպատակներից է համարում Եվրոպայի հետպատերազմյան անվտանգության նոր համակարգի ձևավորումը։ Ռուսաստանի դիրքորոշմամբ՝ քննարկումները չպետք է սահմանափակվեն միայն Ուկրաինայի հարցով։
Բանակցությունների գլխավոր տարաձայնություններից մեկը շարունակում է մնալ տարածքային հարցը։ Ռուսաստանը պահանջում է, որ Ուկրաինան հրաժարվի Դոնբասի՝ Կիևի վերահսկողության տակ գտնվող տարածքներից։ Ուկրաինայի նախագահ Վոլոդիմիր Զելենսկին մերժում է տարածքային զիջումները՝ պնդելով, որ դրանց վերաբերյալ հարցերը կարող են քննարկվել միայն երկրների ղեկավարների մակարդակով և անվտանգության հստակ երաշխիքների համատեքստում։
Ուկրաինական կողմի առաջնահերթություններից են նաև էներգետիկ ենթակառուցվածքներին հարվածների դադարեցումը, Սև ծովում նավագնացության անվտանգության ապահովումը և ռազմագերիների փոխանակումը։
Աբու Դաբի են ժամանել նաև եվրոպական երկրների, Եվրամիության և ՆԱՏՕ-ի ներկայացուցիչներ։ Նրանք առանձին խորհրդակցություններ են անցկացնում ամերիկյան և ուկրաինական կողմերի հետ, սակայն չեն մասնակցում եռակողմ բանակցություններին։ Մոսկվան դեմ է եվրոպացի ներկայացուցիչների ներգրավմանը բանակցությունների այս ձևաչափում։
Բանակցությունները մեկնարկում են շարունակվող ռազմական գործողությունների պայմաններում։ Ռուսաստանը շարունակում է հարվածները Ուկրաինայի էներգետիկ ենթակառուցվածքներին, իսկ Ուկրաինան՝ Ռուսաստանի նավթավերամշակման օբյեկտներին։
ԱՄՆ նախագահ Դոնալդ Թրամփը նախորդ շաբաթ հայտարարել էր, որ հնարավոր է Ուկրաինայի պատերազմից դուրս ավելի լայն համաձայնություն, որը կվերաբերի նաև Եվրոպայի անվտանգությանը։
Պատմություններ
