Հայաստանի երկաթուղու կոնցեսիոն կառավարումը Ղազախստանին փոխանցելու հարցը չի քննարկվել այդ երկրի փոխվարչապետ Ասել Ժանասովայի հետ։ Այս մասին նոյեմբերի 10-ին լրագրողներին հայտնել է Հայաստանի փոխվարչապետ Մհեր Գրիգորյանը։
«Ես նման հարց չեմ քննարկել»,- ասել է Գրիգորյանը։
Մհեր Գրիգորյանը Ղազախստանի փոխվարչապետ, տրանսպորտի նախարար Ասել Ժանասովային ընդունել էր նոյեմբերի 6-ին Երևանում։
Փոխվարչապետի խոսքով՝ հանդիպմանը հիմնականում քննարկվել են միջազգային լոգիստիկ հնարավորությունները և տարածաշրջանային ենթակառուցվածքների զարգացումը։
«Ես Ղազախստանի գործընկերոջս հետ ավելի շատ քննարկել եմ գլոբալ լոգիստիկ հնարավորությունները, որովհետև, ի վերջո, ենթակառուցվածքային զարգացումները մեր Հայաստանի ենթադրում են ավելի մեծ կապակցվածություն»,- ասել է Գրիգորյանը։
Նա նշել է, որ Չինաստանից հետո Ղազախստանն այն երկիրն է, որով, ամենայն հավանականությամբ, տարանցիկ փոխադրումներ են իրականացվելու։
Հայաստանի երկաթուղային համակարգը 2008-ից գտնվում է ռուսական կոնցեսիոն կառավարման ներքո։ Այն կառավարում է «Ռուսական երկաթուղիներ» ընկերության դուստր ձեռնարկությունը՝ «Հարավկովկասյան երկաթուղին»։ Պայմանագիրը կնքվել է 30 տարով՝ ևս 10 տարով երկարաձգելու հնարավորությամբ։
Վարչապետ Նիկոլ Փաշինյանն ավելի վաղ առաջարկել էր Ռուսաստանի համաձայնությամբ երկաթուղու կոնցեսիոն կառավարման իրավունքը փոխանցել Հայաստանի և Ռուսաստանի համար ընդունելի երրորդ երկրի։ Որպես հնարավոր տարբերակ նա նշել էր Ղազախստանը։
Օգոստոսի 24-ին Փաշինյանը հայտարարել էր, որ ռուսական կառավարման պատճառով Հայաստանը կարող է կորցնել միջազգային երկաթուղային ցանցին ինտեգրվելու պատմական հնարավորությունը՝ մատնանշելով Ռուսաստանի նկատմամբ կիրառվող պատժամիջոցները։ Նա ռուսական կողմին առաջարկել էր կոնցեսիոն կառավարման իրավունքը վաճառել երրորդ երկրի։
Հոկտեմբերի 14-ին Փաշինյանը հանդիպել էր «Ռուսական երկաթուղիներ» ընկերության գլխավոր տնօրեն Օլեգ Բելոզյորովին։ Հանդիպման արդյունքներով որոշվել էր ստեղծել հայ-ռուսական համատեղ աշխատանքային խումբ՝ երկաթուղու կոնցեսիոն կառավարման արդյունավետության հետ կապված խնդիրները քննարկելու համար։
Հոկտեմբերի 15-ին վարչապետի որոշմամբ աշխատանքային խումբը ստեղծվել է։ Այն երեք ամսվա ընթացքում պետք է ուսումնասիրի առկա խնդիրները, գտնի դրանց լուծման հնարավորությունները և հստակեցնի հետագա քայլերը։
Փաշինյանի խոսքով՝ աշխատանքային խումբը պետք է պատասխանի նաև այն հարցին, թե ռուսական կողմը պատրա՞ստ է արդյոք անհրաժեշտ ներդրումներ կատարել Հայաստանի երկաթուղային համակարգում՝ այն արդիականացնելու և մրցունակ դարձնելու համար։
Պատմություններ
