ԱՄՆ-ի, Չինաստանի և Ռուսաստանի առաջնորդները կհանդիպեն՝ քննարկելու միջուկային սպառազինությունը, բայց ոչ Ուկրաինան
Միացյալ Նահանգների նախագահ Դոնալդ Թրամփը, Չինաստանի նախագահ Սի Ծինփինը և Ռուսաստանի նախագահ Վլադիմիր Պուտինը նոյեմբերի 19-ին կհանդիպեն Չինաստանի Շենժեն քաղաքում։ Սպիտակ տան հայտարարության համաձայն՝ պատմության մեջ երեք երկրների ղեկավարների առաջին եռակողմ գագաթնաժողովի գլխավոր թեման կլինի միջուկային սպառազինությունների կրճատումը։ Ուկրաինայի պատերազմը քննարկել չի նախատեսվում, հաղորդում է BBC-ի ռուսական ծառայությունը։
Հանդիպումը կկայանա Ասիա-խաղաղօվկիանոսյան տնտեսական համագործակցության (APEC) գագաթնաժողովի շրջանակում։
Սպիտակ տան ներկայացուցիչ Օլիվիա Ուելսի խոսքով՝ Թրամփը մտադիր է քննարկել աշխարհում միջուկային զինանոցների կրճատման հնարավորությունները։ ԱՄՆ նախագահը միջուկային զենքի տարածումը համարում է միջազգային անվտանգության գլխավոր սպառնալիքներից մեկը։
Սակայն Վաշինգտոնը չի ակնկալում, որ հանդիպման արդյունքում անմիջապես համաձայնագիր կստորագրվի։ ԱՄՆ վարչակազմի բարձրաստիճան պաշտոնյան, որի անունը չի հրապարակվում, բանակցությունները բնութագրել է որպես նախնական քննարկում երեք երկրների ղեկավարների մակարդակով։
Հիմնական բարդություններից մեկը Չինաստանի դիրքորոշումն է։ Պեկինը տարիներ շարունակ հրաժարվել է մասնակցել Միացյալ Նահանգների և Ռուսաստանի հետ միջուկային սպառազինությունների վերահսկման եռակողմ բանակցություններին՝ պնդելով, որ նախ պետք է պայմանավորվեն Վաշինգտոնն ու Մոսկվան, որոնք ունեն աշխարհի ամենամեծ միջուկային զինանոցները։
Ստոկհոլմի խաղաղության խնդիրների հետազոտության միջազգային ինստիտուտի (SIPRI) տվյալներով՝ միջուկային մարտագլխիկների թվով առաջին տեղում Ռուսաստանն է, որին հաջորդում են Միացյալ Նահանգները և Չինաստանը։
Փետրվարին ավարտվել է ԱՄՆ-ի և Ռուսաստանի միջև ռազմավարական հարձակողական սպառազինությունների կրճատման մասին վերջին պայմանագրի՝ New START-ի գործողության ժամկետը։ Դրա ավարտով առաջին անգամ ավելի քան կես դարում երկու երկրների միջուկային զինանոցների նկատմամբ պայմանագրային սահմանափակումներ չեն գործում։
Թրամփը նախկինում մերժել էր պայմանագիրը ևս մեկ տարով երկարաձգելու Ռուսաստանի առաջարկը՝ փոխարենը հանդես գալով նոր համաձայնագրի օգտին, որին կմասնակցեր նաև Չինաստանը։
Պատմություններ
