Ազգային ժողովն առաջին ընթերցմամբ ընդունել է Առողջության համընդհանուր ապահովագրության համակարգի ընդլայնման նախագիծը՝ 53 կողմ, 0 դեմ և 29 ձեռնպահ ձայներով։
Նախագծով նախատեսվում է 2027-ի հունվարի 1-ից համակարգում ընդգրկել մինչև 200,000 դրամ աշխատավարձ ստացող շուրջ 350 հազար աշխատողի։ Ամսական 10,800 դրամ ապահովագրավճարից 4400 դրամը կվճարի պետությունը, 4400-ը՝ գործատուն, իսկ 2000-ը՝ աշխատողը։
Համակարգում նախատեսվում է ընդգրկել նաև էլեկտրոնային հարթակներով աշխատող տաքսու վարորդներին։
Քաղաքացիները հնարավորություն կունենան կամավոր ապահովագրել նաև ընտանիքի անդամներին։
Առողջության համընդհանուր ապահովագրության համակարգը Հայաստանում գործարկվել է 2026-ի հունվարի 1-ից։ Առաջին փուլում դրանում ընդգրկվել են մինչև 18 տարեկան երեխաները, 65 տարեկան և բարձր տարիքի անձինք, հաշմանդամություն ունեցող և սոցիալապես անապահով քաղաքացիների որոշ խմբեր, ինչպես նաև առնվազն 200,000 դրամ աշխատավարձ ստացող աշխատողները։
Առաջին խմբերի ապահովագրավճարներն ամբողջությամբ ֆինանսավորվում են պետական բյուջեից։ Աշխատող քաղաքացիների համար գործում է ապահովագրավճարի մասնակի փոխհատուցման համակարգ։
Կառավարության ծրագրով առողջության համընդհանուր ապահովագրության ներդրումը նախատեսված է փուլային կարգով՝ մինչև 2028-ը։
Նոր փոփոխությունները դեռ պետք է ընդունվեն երկրորդ ընթերցմամբ և ամբողջությամբ՝ օրենքի ուժ ստանալու համար։












