Civilnet
Սերժ Սարգսյանը և նրա թիմը երբեք չեն գնա յուրայինների դիակների վրայով անցնելու ճանապարհով: Այս մասին այսօր լրագրողների հետ հանդիպմանն ասաց Հանրապետական կուսակցության փոխնախագահ Գալուստ Սահակյանը՝ անդրադառնալով «Ժառանգության» ղեկավար Րաֆֆի Հովհաննիսյանի` մարտի 9-ին հայտարարած հացադուլին և հայտարարությանը, թե Սերժ Սարգսյանի երդումնակալության արարողությունը կկայանա միայն իր՝ Հովհաննիսյանի դիակի վրայով:
«Մենք զոհերի կողմնակից չենք և պատերազմի ժամանակ էլ ասում էինք մեր մարտիկներին, որ մեռնելու իրավունք չունեն: Այսինքն՝ մեռնել նշանակում է հիասթափություն, այնպես, որ չեմ գնահատում Րաֆֆի Հովհաննիսյանի այդ դարձվածը»,- ասաց Սահակյանը՝ վստահություն հայտնելով, որ Սերժ Սարգսյանի երդման արարողությունը, այնուամենայնիվ, տեղի կունենա:
«Չէի ցանկանա, որ Րաֆֆի Հովհաննիսյանը հացադուլ աներ: Բնականաբար, եթե հարց լինի ոչ թե զորակցելու, այլ պարզապես միջամտելու հացադուլին, ես կայցելեմ Րաֆֆի Հովհաննիսյանին»,- ասաց խմբակցության ղեկավարը՝ անդրադառնալով, այն հարցին, թե արդյոք կայցելի հացադուլ հայտարարած Րաֆֆի Հովհաննիսյանին: Իսկ հարցին, թե արդյոք Հովհաննիսյանին կայցելի Սերժ Սարգսյանը՝ Սահակյանը նշեց, որ փիառի տեսակետից շատ լավ բան է, բայց «կայցելի՝ չի այցելի. չեմ կարծում, որ ժողովրդի փորը դրանով կկշտանա»:
Սահակյանը նշեց, որ իշխանությունը գնալու է ռադիկալ փոփոխությունների ճանապարհով և առաջարկում է բոլոր ուժերին միանալ այդ փոփոխությունների իրականացմանը:
Անդրադառնալով «Ժառանգություն» կուսակցության և մի շարք այլ քաղաքական ուժերի առաջարկներին՝ կապված Սահմանադրական փոփոխությունների, Հայաստանի կառավարման ձևը խորհրդարանական կառավարման վերափոխելու, նոր խորհրդարանական ընտրություններ կազմակերպելու, Ընտրական օրենսգրքում փոփոխություններ կատարելու և վերահսկողական մարմիններում ընդդիմության ներկայացուցիչներ ունենալուն՝ Սահակյանը նշեց, որ Սահմանադրական փոփոխությունները քննարկելի են, բայց ՀՀԿ-ի ստորագրությամբ կառավարման ձև չի կարող փոխվել: Սահակյանը նշեց, որ նոր խորհրդարանական ընտրությունները՝ թե՛ բարոյական, թե՛ իրավաբանական տեսակետից անհնարին են, սակայն չբացառեց վերահսկողական մարմիններում ընդդիմության ներկայության հնարավորությունը:
«Ընդդիմությունը բնական է, որ պետք է պայքարի և քննադատի իշխանություններին և դա մի կողմից էլ օգնություն է իշխանությանը՝ ծրագրերի բացը լրացնելու համար»,- ասաց Սահակյանը:
Պատմություններ
