Civilnet
Բոլորն էլ գիտեն, որ ընդդիմությունը հաղթել է ընտրություններում, սակայն նորությունը կլինի այն, որ ընդդիմության դե ֆակտո հաղթանակը դառնա դե յուրե: Այսօր Ազատության հրապարակում լրագրողների հետ հանդիպմանն այսպիսի տեսակետ հայտնեց ԱԺ «Ժառանգության» խմբակցության ղեկավար Ռուբեն Հակոբյանը:
Նա նշեց, որ թեև Սահմանադրական դատարանից առանձնապես մեծ սպասելիքներ չունեն, սակայն «դիմելը, միևնույնն է, անհրաժեշտություն էր, քանի որ դա միակ կառույցն է, որը կարող է վերահաշվարկի որոշում կայացնել»:
Անդրադառնալով ՀՀԿ-ական գործիչների հայտարարություններին, թե Րաֆֆի Հովհաննիսայնն ու իր թիմակիցները չգիտեն, թե ինչ են ուզում` Հակոբյանն ասաց. «Եթե իրենք չեն հասկանում, թե ինչ է ուզում Րաֆֆի Հովհաննիսյանը, մենք և հարյուր հազարավոր մարդիկ, ապա ես ոչինչ չունեմ իրենց ասելու»:
Մարտավարական հետագա քայլերի մասին «Ժառանգության» խմբակցության ղեկավարը չցանկացավ խոսել` նշելով, թե չի ուզում մանրամասնել դրանք: Միաժամանակ` Հակոբյանը վստահեցրեց, որ հստակ քայլեր կան, պարզապես դրանք իրագործելու համար ժամանակ է պետք, իսկ գործընթացն արդեն սկսվել է:
Հիշեցնենք, որ «Ժառանգության» առաջնորդ Րաֆֆի Հովհաննիսյանը մարտի 10-ից հացադուլ է հայտարարել Ազատության հրապարակում` գործող նախագահ Սերժ Սարգսյանից պահանջելով ճանաչել «ժողովրդի հաղթանակը»:
Պատմություններ
