Սթիվ Ջոբսի մասին կատակերգություն է նկարահանվել

Ամերիկյան Funny or Die ստուդիան, որը մասնագիտացած է կատակերգական նկարահանումների արտադրության ոլորտում, լիամետրաժ կատակերգություն է նկարահանել ամերիկյան Apple տեխնոլոգիական ընկերության հիմնադիր Սթիվ Ջոբսի մասին` iSteve, հաղորդում է New York Times-ը: Ֆիլմը ապրիլի 15-ից կցուցադրվի օնլայն տարբերակով: Հատկանշական է, որ Ջոբսի կյանքն արվեստի գործիչների շրջանում մեծ հետաքրքրություն է առաջացնում: Ուոլթեր Այզեկսոնի հեղինակած` Apple-ի հիմնադրի կենսագրությունը դարձել է միջազգային բեսթսելեր, իսկ Sony Pictures-ը նկարահանում է նրա կենսագրության սեփական պաշտոնական տարբերակը: Նշենք, որ iSteve-ը նկարահանվել է ընդամենը 5 օրում: Նկարահանող խումբը խոստովանել է, որ սցենարի կազմման ժամանակ հիմնվել է «Վիկիպեդիա» օնլայն հանրագիտարանի տվյալների վրա: Նախագծի հեղինակ Ռայան Փերեսը նշել է, որ թեև դա հիմարություն է, սակայն յուրահատուկ հայացք է Ջոբսի կյանքի նկատմամբ: NYT-ի հաղորդմամբ` Փերեսն ի սկզբանե մտադիր էր ստեղծել կատակերգական մի քանի տեսանյութեր, սակայն ի վերջո այդ ամբողջն ընդգրկվեց մեկ ֆիլմում: Հեղինակի խոսքով` սցենարը գրվել է 3, իսկ նկարահանումներն իրականացվել են 5 օրում: Նա նշեց նաև, որ թեև iSteve-ը չի լինի ամենալավ ֆիլմը Ջոբսի մասին, սակայն կլինի առաջինը: