Google Play-ը փոխում է դիզայնը` դառնալով ավելի վառ ու ընդարձակ

Ամերիկյան Google տեխնոլոգիական ընկերությունը պատրաստվում է թողարկել Google Play օնլայն խանութի նոր տարբերակը, որի օգնությամբ Android սարքավորումների օգտվողներին հասանելի կլինեն բջջային ծրագրեր, ֆիլմեր, գրքեր և երաժշտություն, հաղորդում է Slashgear-ը: Հատկանշական է, որ այս տարբերակում նոր գործառույթներ չեն ավելացվել: Բոլոր նորամուծությունները վերաբերում են միայն դիզայներական փոփոխություններին: Ընկերությունը որոշել է հրաժարվել խամրած դիզայնից, և շուտով Google Play-ը կնմանվի նախկին Android Market-ին: Օնլայն խանութի յուրաքանչյուր բաժին կունենա իր գույնը: Google Play 4.0-ի նոր դիզայնում կարելի է նմանություններ գտնել Google Now անձնական օգնականի հետ: Ակնկալվում է, որ թարմացված Google Play-ը կներկայացվի ընկերության ամենամյա Google I/O համաժողովի ընթացքում, որը կանցկացվի մայիսի 15-17-ը Սան Ֆրանցիսկոյի Moscone Center կենտրոնում: