«Կասպերսկու լաբորատորիան» կհամագործակցի Ինտերպոլի հետ

Համակարգչային անվտանգության համակարգերի մշակմամբ զբաղվող ռուսական «Կասպերսկու լաբորատորիան» որպես փորձագիտական ընկերություն սկսել է համագործակցել Ինտերպոլի հատուկ ստորաբաժանման հետ, որը զբաղվում է բարձր տեխնոլոգիաների ոլորտում կատարված հանցագործությունների հետաքննությամբ (Interpol Global Complex for Innovation), հաղորդում է «Ռիա նովոստին»: «Կասպերսկու լաբորատորիան» Ինտերպոլին խորհրդատվական ծառայություններ կտրամադրի կիբերհարձակումների հետաքննության ընթացքում: Բացի այդ` ընկերությունը մտադիր է իր փորձագետներին ուղարկել Ինտերպոլի Սինգապուրի հատուկ ստորաբաժանում` աշխատելու, որը նախատեսված է բացել 2014թ.: Group-IB հետազոտական ընկերության տվյալների համաձայն, որը նույնպես զբաղվում է կիբերհարձակումների հետաքննությամբ, 2011թ. համակարգչային հարձակումների համաշխարհային շուկայի ծավալը կազմել է $12,5 մլրդ, ինչը $5,5 մլրդ-ով գերազանցում է նախորդ տարվա ցուցանիշը: 2012թ. տվյալները բացակայում են: Հիշեցնենք, որ 2013թ. սկզբին տեխնոլոգիական մի շարք խոշոր ընկերություններ հայտարարեցին հաքերային հարձակումների մասին, որոնց թվում են Apple-ը, Facebook-ը, Twitter-ը, Microsof-ը: Նույն ժամանակահատվածում հարձակումների են ենթարկվել նաև ԱՄՆ մի շարք պետական գերատեսչություններ և լրատվամիջոցներ, ինչպես օրինակ New York Times-ը, Washington Post-ը և Wall Street Journal-ը: Կիբերհարձակումների մեջ վերջիններս մեղադրեցին չինացի հաքերներին: